عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Monday, August 28, 2006

مع فريدة أتكلم

عزيزتى فريدة
افكارك وكلامك فى منتهى الجرأة وفى منتهى الصح، انا قعدت اقرأ وقت طويل فى مدونتك، وعجبنى كلام كتير أوى. أصل انا اكتر حاجه شاغلانى فى الدنيا الناس، والعلاقات ما بينهم، والشد والجذب، الآبس أند داونز زى ما بيقولوا إخوانّا الفرنجة.
وعشان ما اكتبش تعليق طولى كده فى مدونتك فكرت اكتبلك عندى، واهى بالمرة تتشرف مدونتى بزيارتك لو حبيتى.
عن مشكلة المطلقات و إللى بتعدى التلاتين من غير جواز، أقول
المشكلة فعلاً كبيرة ... أسبابها الراجل والست على حد سواء... فى تصورى إن مافيش حد يقدر يفرض على حد وضع معين غصب عنه ... صحيح المجتمع ما يعلم بيه إلا ربنا .. ونظرتهم سيئة جداً للمطلقة - طبعاً اكتر من المطلق بمراحل - بس برضه، ممكن الواحد يعترض وكمان يرفض فرض وضع معين يكون رافضه. فلو الراجل مصر يضطهد المرأة برضه هى تقدر تديله فى سنانه وترفض الإضطهاد والقهر ده.
لسه الصبح كنت بتكلم مع ماما - إللى بالمناسبة هتموت و أتجوز- وكانت بتقولى " مانا كان ممكن اجوزك وانتى عندك 16 سنة وكان زمانك إبنك ولا بنتك فى تالتة ابتدائى" قلت لها وانتى فاكره انى كنت هرضى اتجوز ساعتها.
طبعاً ممكن دى تكون فروق شخصية ومش كل الناس تقدر تكون قاطعة فى ردها، بس بقول إنه ممكن. يعنى إيه إللى يغصب أى حد على اى حد تانى مش مرتاح معاه؟ ممكن تكون ظروف مالية، وغالباً نظرة المجتمع للست المطلقة، ده إللى بيخلى ستات كتير يرضوا بإللى هسميه - مع إحترامى - فرط الرجاله، إللى بيبقوا زى العنب الفرط اللى بيقع من العناقيد وبيبقى إسود ومفعص وشكله عار.
الناس بتبص للست المطلقة - وده كلام سمعته من ناس مفترض فيهم الإحترام - على إنها قنبلة موقوتة، هى ست "مجرّبة" لا تستطيع نسيان التجربة ولو بمرور الوقت، اذاً هى خطر على الرجال المرتبطين و"الخاليين" من الإرتباط ايضاً. وبشكل عام نحن كبشر نحب أن ننسى ان كل ما يحدث "للآخرين" من الممكن ومن البديهى أحياناًً أن يحدث لنا نحن أيضاً. وبناء على ذلك النسيان نبدأ فى الإتهام والتجريح والشك فى الآخرين بإعتبارهم مصدر مشاكل وتهديد وقرف ماله أول ولا آخر، ونحن متناسين اننا ممكن أن نكون فى مكانهم ونكون أيضاً مصدر نفس القرف.
نكره المطلقات والعوانس والمرضى وكبار السن و الآخر بشكل عام لأننا ننسى اننا نحن أيضاً "آخر" قد يكون مكروهاً لسبب أو لآخر فى يوم من الأيام.
الستات والبنات وكل من تتبع حواء ليست ضعيفة إطلاقاً، ولا من جوة ولا من بره، كل الحكاية حاجة من إتنين - فى رأيى الصغنن جداً طبعاً- يا إما حد بيقعد يغسل مخها من وهى صغيرة بكلام خايب عن ضعفها وحاجتها لضل راجل، وإنها لازم تتصرف وتعيش بشكل معين وإلا تبقى مجنونة ومعتوهة وناشز، يا إما هى بتبقى أكسل من إنها تكتشف قوتها دى، وتبقى إتكالية عاوزه حد يعملها كل حاجة.
هو بصراحة كل الجنس البشرى لا يتسم بالضعف - اللهم إلا ضعف العقول أحياناً - بس الستات إتفهم عنهم الضعف كده من غير دليل علمى بالموروث و العرف وكثير من إدعاء المرأة نفسها لضعف غير حقيقى ربما لإكتساب محبة أو تحقيق غرض ما هى وحدها تعلمه.
بس فيه حاجة أحب أقولك عليها، دلوقتى فيه كلمة بقت بتتقال كتير جداً وسمعتها أكتر من مرة، "يتقال عليا مطلقة احسن ما يتقال عليا عانس" بنات كتير بتقول كده دلوقتى، وبيبقى نفسى حد يفهمهم إن اللى بيقول الإتنين أصلاً جاهل ومش فاهم حاجة فمش هتفرق معاه، فى الحالتين المرأة مذنبة ومحكوم عليها.
اختاه، مجتمعنا ناقصة كتير أوى، ومش هيتعدل غير لو كل واحد بص لنفسه، وتخيل نفسه مكان كل واحد تانى هو بيأذيه أو بيضطهده أو بيظلمه أو بيشتمه أو بينتهكه أو أو .... زى بالظبط مانتى قلتى، بيبقوا ستات برضه اللى بيرفضوا الست المطلقة انها تتجوز ابنهم، وبيبقوا ستات برضة اللى بيقعدوا يقولوا بيحبها على إيه والكلام اللى انتى فاهماه.
أنا عارفة إنى طولت موت، بس أنا فى بلوجى بقى :)
متابعاكى، واتمنى أنول شرف متابعتك يا فندم - يعنى لو فيه حاجة تستاهل

5 comments:

farida said...

اولا أعتذر بشده عن تأخري في الرد عليكي

شكرا لإعجابك بالبوست و تدوينك بوست كامل تعليقا عليه

انا ححاول أعمل لينك لتعليقك ده على البلوج بتاعي " و لو اني خايبانه شويه في مواضيع الكمبيوتر دي" المهم

تعليقك جميل جدا ووافي جدا
فعلا الناس بتبص للمطلقه على انها مجربه
و الستات ساعات بيعيشوا مع رجاله أسوأ من الفرط خوفا من الطلاق

"يتقال عليا مطلقة احسن ما يتقال عليا عانس"

الجمله دي صدمتني
هل ده حقيقي فعلا للدرجه دي
المطلقه بتظلم معاها أولاد ملهمش ذنب انها اتجوزت علشان الجواز و خلاص

ومش هيتعدل غير لو كل واحد بص لنفسه، وتخيل نفسه مكان كل واحد تانى هو بيأذيه أو بيضطهده أو بيظلمه أو بيشتمه

كلامك ده هو وجهة نظري 100% لأن سبب عيوب شعوبنا اننا لا نتقبل الآخر
مفهوم الآخر ده عندنا معدوم تماما


المهم.. شكرا لإهتمامك و أن يشرفني زيارتك دائما
انا كويسه جدا في الانجليزي و حقرا كل بوستاتك ان شاء الله
فريده

ME said...

قد إيه انا سعيدة جداً بردك وبزيارتك
وكمان غنتى ما إتاخرتيش ولا حاجة، بسيطة يا ستى وفى بيتها زى ما بيقولوا
و إن شاء الله متابعاكى دايماً حتى لو إعتبرتيها غلاسة لإنى فعلاً معجبة بآرائك ودماغك الصح أوى بجد

Familiar Stranger said...

Dear "Me" & "Farida"
I am very proud of both of you...
You have both covered this topic very well & I believe that unfortunately - we all claim to hate el mogtama3 & how we think & how we dont accept "the other".
But at the end of the day, no one realizes the truth of the matter, & no one ever changes...
Sad,
F.S.

ME said...

Dear F.S.
thank you so much for taking out of your time to comment on the post.i believe that change comes from within each and every person who really believes in it.. realizing the concept of "the other" made me change, and i'm trying my best to widen that concept in my mind till it reaches total acceptance..wish me luck ba2a :)
thnx

Anonymous said...

hiana sara ana bakrah el gahi w e3tibar in el mar2a ka2in tafih w da3if w maye2darsh ye3mil 7aga ...barfod fekrit inik l2anik bent teb2i tafha w da3iyfa w in kol ili yet2alik 3alih lazem tenafizeh mn 3'er nekash el bint ka2in w loh kayan loh 3a2l loh sha7'siya w hiya ili be edha te3'ayar nazret el nas 3anha