عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Wednesday, September 13, 2006

إزاى كده؟

بصراحة كده مش كويس أبداً ... يعنى أنا عمالة أقرأ كلام كويس أوى بيعبر عن أفكار لطيفة أو سخيفة مش مهم إنما أهو بيعبر عن أفكار ناس زينا برضه .. إنما إللى مش فاهماه مصيبة الأخطاء الإملائية!!!! ومش بقول النحوية ... يعنى أنا واحدة من الناس فى أغلب الأحوال بفضّل إنى أكتب بالعاميّة عشان أخطائى فى النحو ما تتفقسش .. بس المأساة بقى إللى عمالة ألاقيها منتشرة .. الناس الجامدة أوى معظمهم عندهم أخطاء إملائية !!! يادى المصيبة!!! ده كده يبقى الواحد ماعداش من روضة - معلش أصل على أيامى كنا بنسميها كده وماكناش بنسميها كى جى تو - يعنى لو أخطاء نحوية ماشى، مبلوعة .. برضه النحو ده كان بيطلع عينينا فى المدرسة .. إنما أخطاء إملائية!!! ياخبر إسود!!! يعنى مين قال إن فاء العطف يبقى فيها ألف وتبقى "فا" ؟ إزاى دى؟ ولا لقيت واحد كاتب: الشكوى لغير الله "مزلة" !!! طبعاً هو يقصد "مذلة" و أنا إللى بدقق على حاجات غريبة و إنما الأعمال بالنيات بقى ... طيب اللغة ذنبها إيه بالنيات المهببة دى؟! آآه وكلمة ذنب برضه لقيتها كذا مرة مكتوبة بالزاى - إللى بنقول عليها زين - وكلمة كذا نفسها لقيتها برضه مكتوبة بالزاى ... ناس تشقلب الحركات لحروف ويخلوا الفتحة ألف، وناس تخلى الحروف نوايا وإفهمها إنت بقى لو شجيع!!! وناس تكتب لك كلمة مرأة كده : "مراءة" وإللى يكتب لك كلمة مفاجأة من غير ألف بعد الفاء!!
حاجة يعنى تفرح بصراحة ربنا
حد أخد باله من إعلان لوكس إللى متعلق فى الشوارع إللى فيه صورة إليسا؟ حد اخد باله إنهم كاتبين "ماتخفيش" من التألق باين ولا مش عارفة إيه ... ما"تخفيش"؟!! يعنى دى بقى كانت نيتهم فيها إنها ما تخافش-من الخوف- ولا إنها ماتخِِِفّش التألق-يعنى تقلله- ولا إنها ما تِخفيهوش- من الإخفاء وعدم الإظهار يعنى- بالظبط إيه المقصود من الكلمة دى .. ولا كل واحد وعقله بقى؟
المصيبة الأشنع بقى، إمبارح كنت فى ندوة ما وكان فيه واحد بيقدم الندوة وكان بيتكلم عن إنه ياريت نحاول نتفادى الأخطاء النحوية وكان موجه كلامه لل"نقاد" إللى هيتكلموا عن الرواية .. وقعد واحد منهم يدش ييجى ساعة وعمال يقول ألفاظ قد دماغه ويروح فى وسط الكلام إللى كان حريص على تشكيله إظهاراً لمهارته اللغوية ويروح جاى بقى قايل مفاجأة جامدة جداً .. وهو منهمك أوى فى تشكيل كلامه راح قايل: "لنصوصَ" !!! آه والله بالفتحة فى الآخر... ولا كأن إللى فى الأول دى لام جر ... يعنى أنا بطيخة فى النحو .. بس دى كانت أكتر من البطيخ بكتير .. أصلاً وقعت ضحك .. يعنى متفشخر أوى كده وعمال ترص فى كلام متين .. ركز بقى فى التشكيل أو ما تشكلش خالص وخليك عادى .. يعنى هو إحنا فى إمتحان العربى بتاع ثانوية عامة
حاجة بصراحة بقت تكسف إن ناس .. كبار .. سناً وتعليماً .. تبقى عندهم غلطات إملائية .. بصراحة خيبة بالويبة ووكسة قوية أوى ... و د. ميشيل حنا كان زعلان أوى إنه إشترى مجلة أطفال ماكانوش مهتمين بهمزة الوصل والقطع وإنهم كده هيعلموا العيال غلط !! مايعرفش إنه فى كل الأحوال العيال هتتعلم غلط برضه، وماجاتش على المجلة يا دكتور!! ويجعله عامر

8 comments:

LAMIA MAHMOUD said...

ساعات بيبقى اللي بيكتب بيكتب بسرعة ومعندوش وقت فبيسقط حرف ولا حرفين

Anonymous said...

بصراحة كويس إن في حد إفتكر اللغة العربية
لأن خلاص معدش حد مهتم بيها كأن معدش ليها لازمة
بس برده إحنا ملناش ذنب في ضعف اللغة العربية
إحنا أساسا متعلمناش لغة عربية في المدارس
و اللي فلت مننا و إتعلمها يبقي عشان موهبة شخصية عنده
يعني في مثلا إمتحان
Toefl
للغة الإنجليزية يعتبر مقياس موحد علي مستوي العالم
طيب ليه مفيش إمتحان زي ده للغة العربية جايز في و أنا معرفش
صحيح هو اللي يحب يتعلم لغة عربية من جديد يعمل إيه

مفلس افندى الرايق said...

انا عن نفسى ف النحو فظيع

بكتب كلام تخميس ف تربيع

واوقات اسمى من نفوخى بيضيع

اصلنا بقينا عايشين

فى عصر التلميع

وهيع هيع هيع

مفلس هيبقى فظيع

Lasto-adri *Blue* said...

اللغة العربية عندى فى الحضيض حقيقى وللاسف
بحاول اغيرها بس لا وقتى يسمح.. ولا حتى دراستى
كلها بالانجليزى العلمى ده.. اللى حتى لا خلى العربى على حيله و الانجليزى بخيره
واكيد واضح ان الفرنساوى بقى فى خبر كان

اعذرينى.. بس اسكت.. ماتكلمش عشان مش بعرف اكتب
:S

Яαgιи Яαvєи said...

خلاص يا شباب... متكتبوش تاني عشان في مدرّس عربي بيتصحّف المنتديات...

I'm just kidding. I reckon your Arabic skills are really fine. unfortunately, mine are not. I try to hide it behind العاميه...

و الشكوى لغير الله مذلّه... أدينا بنتعلّم أهه...
ميرسي بوكو

Ayat said...

لمياء:

ممكن فعلاً يكون الواحد بيكتب بسرعة، بس مش هتيجى الغلطة فى نفس الكلمة كل مرة .. صح؟

محمد:
فى تصورى إن القراءة كفيلة بحل المشاكل الإملائية على الأقل. ولو عاوز تتعلم عربى، ركب شنب ودقن بس يكونوا لونهم أشقر وقولهم أنا أجنبى وإتعلم "أرابو" :)


مفلس أفندى:
إنت سكر :) وكلنا هذا "الفظيع"

لست أدرى:
فعلاً الدراسة أوقات بتضيع حاجات الواحد إتعلمها قبل كده .. والشغل برضه أوقات بينسى الواحد إسمه كمان :)

Raven:
أنا مدرسة عربى؟!! إيشحال إن ماكنتش بقول على نفسى ضايعة فى النحو :)

ماحدش يزعل منى يا جماعة
أنا مشكلتى إنى باخد بالى من حاجات صغيرة بحب أخلى الناس كمان ياخدوا بالهم منها.. و أول واحدة فضحتها كانت أنا .. وإللى غاظنى أوى وخلانى إتكلمت فى الموضوع الراجل الناقد بتاع نصوصَ ده .. بجد كان نفسى أقوم أقولهاله فى وشه :)

كلبوزة لكن سمباتيك said...

اوبا
طيب ده انا كده حتشرح بقي
انا كتبت فترة طويلة من سنة 99 فرانكو اراب
و لما رجعت اكتب عربي لقيت روحي مبهدلة مامة اللغة اخر بهدلة
بمعلش يا مي يا اختشي استري عليا الله يستر عليكي
انبي يا اختشي كنت بجيب عشرة من عشرة في الاملاء بس العيب في الكيبورد
و ربنا ما يقطعلك بوست و لا ييتم لك بلوج
قبلاتشي

Anonymous said...

hi ana sara bosi ya siti..1..e7na mat3alimnash 3arabi aslan ..2..e7na kaman bendaya3 shewayet el 3arabi eli fakrinhom be el franko arab ..zay 7adreti keda..w be el 3arabizi ya3ni el nas eli bttetkalim 3arabi 3ala english ade kol el 7ekaya..