عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Thursday, September 21, 2006

فى مشكلة

بجد يا جماعة أى حد يقرا الموضوع ده يقولى رأيه إيه
فيه بنت كانت زميلتى فى الشغل القديم ، إتقرت فتحتها على ولد برضه كان معانا فى الشغل .. البنت أنا أعرفها بشكل كبير .. ماقدرش أقول إننا أنتيم يعنى .. لكن عارفة أخلاقها كويس وطريقة تفكيرها ومستواها المادى
الولد بقى أعرفه كويس جداً جداً .. كان بيتعامل معايا على إنى أمه الروحيه لوقت طويل .. طبعاً ده كلام فارغ .. ولا أمه ولا روحية ولا نيلة
المشكلة بقى فييين؟! أقولكوافين ..
هى محترمة وجد ودوغرى جداً وده مش كلامى لوحدى ده كلام كل الناس عنها .. وعلى قد الفترة إللى عرفتها فيها أقدر أقول إنها طيبة جداً .. من نوعية إللى على قلبها على لسانها .. لو مارتاحتش لحد ما تتعاملش معاه .. كده وشّ .. ولو إرتاحت لحد تعامله كأنه من لحمها ودمها .. جدعة جداً جداً لدرجة تسليف نص مرتبها لو حد مزنوق فى فلوس .. تعليمها كويس جداً .. بتلعب بيانو .. و دماغها أوبرا وخيرت وباليه .. حسها الثقافى كويس لحد كبير وده إنطباعى من نوعية الكتب إللى كنت بشوفها معاها .. وكنا أوقات نبادل الكتب مع بعضنا .. وكانت تيجى تحكيلى عن الباليه اللى حضرته ولا حفلة خيرت فى الأوبرا .. وهى الوحيدة فى المكان المشؤوم بتاع شغلنا ده إللى كانت فاهمة الدماغ إللى كنت عاملاها بعد حفلة الأوبرا إللى حضرتها .. صح فى شغلها جداً، وترتيبها كان بيبقى كويس أوى معظم الوقت وده معناه إنها ماشية صح جداً وزى ما الكتاب بيقول .. وده على فكرة سارى على البنات بس فى الكول سنتر لأن الولاد ... يختىىىىىىىىىى من عمايلهم ... دى هى
هو بقى ... هو إللى فى جيبه - صراحة - مش ليه .. مش بخيل خالص، ومجامل ... بس ... مجامل لمصلحته .. من نوعية الناس إللى يفتكر عيد ميلادك ويجيبلك فيه هدية لطيفة .. عشان فى عيد ميلاده تجيب له هدية "ألطف".... يدور على إيه الكويس فى حد ويشبط فيه .. يعنى مثلاً "فلان" بيلبس كويس ، يلزق لأمه و إلحاح لدرجة الزنّ ويركبه العصبى عشان ينزل ينقى معاه هدوم ليه هو.. شبط فيا يوم ما قابلنى فى معرض الكتاب صدفة.. وقالى أنا جيت أشوف إيه اللى بيحصل هنا مخليكى مهتمة أوى كده إنك تيجى.. وبقى عمال يسأل عن كل كتاب أشتريه "إشمعنى ده؟ هو حلو؟ طب بيحكى عن إيه؟ طب أشتريه؟" كده طول اليوم .. "علمينى أستخدم الموبايل" ده لما جاب واحد جديد فيه كاميرا و حركات .. يابنى ماتقرا الكتالوج؟!! مانا مش فاهم حاجة .. ومش هى دى المشكلة .. يعنى هو مش شخص ممكن تاخد رأيه فى حاجة .. ودى مصيبة لوحدها... كمان حصل كام موقف خلونى أعرف إنه كداب ومألفاتى حكايات ، بس للأسف ماعنديش دليل مادى أقدر أستند عليه .. وكمان كان حلنجى فى الشغل .. كان بيخترع ألف طريقة وطريقة عشان ماياخدش مكالمات .. ده غير إنه كان بيقعد يشتغل الناس اللى بتتصل ويقولهم كلام مش صح ومش مظبوط .. وكنت أقوله يابنى حرام عليك يقولى على قد اللى بيعملوه فينا .. أقوله هو عشان الناس وحشة نبقى وحشين زيهم .. وجدل بقى مما شابه مابين إنى أعامل الناس زى معاملتهم ولا أعاملهم بالصح وخلاص بغض النظر عن "هما إيه" ... ده هو
البنت سألتنى عنه .. ماعرفتش أقولها إيه... وعندى إحساس فظيع إنه بيعرفها عشان فلوسها .. أصل أهلها ناس مرتاحين مادياً شويتين .. وحتى لو مش كده .. هو كداب .. وأنا عارفه ده كويس أوى ومتأكده منه .. بس آااه لو كنت خدت الوصل .. يعنى لو كان معايا دليل .. وبصراحة ضميرى واجعنى وقلقانة على البنت تتخم فيه أكتر ماهى مخمومة
بجد يا جماعة أى حد يقرا الموضوع ده يقولى رأيه إيه .. أقولها ولا لأ .. وأقولها إيه و إزاى ... فكروا معايا .. وربنا يكفينا شر أمثاله

5 comments:

human said...

أولا هما لسه قاريين الفاتحه.....وفبه لسه فترة خطوبه....حاولي تكلميها بطريقه لطيفه وغير مباشره عشان ماتفهمش غلط وحاولي تشوفي عاجبها إيه فيه

ayhm jzzan said...

حاولي تبهيها بطريقة غير مباشرة كمان ممكن تحاولي بطريقة غير مباشرة تفهمي أكثر عنو وتتأكدي من شعورك

Anonymous said...

خليها تقرا البلوج ده وتقرر بعدها بنفسها

Kaf-una-ka said...

قولي لها رأيك فيه بصراحة وعينك في عينها وماتخافيش من حد ولا من حاجة

Anonymous said...

hi ana sara bosi heya law dema3'ha sa7 hate3raf mn 3'er 7aga l2an fi fatret el 7'otoba hayban kol 7aga ama law ma7'moma fi gamid fa enti lazem t2olilha w bema inik sa7bitha fa mesh hatez3al mnik abadan w hate3raf enik bt2oli keda li masla7etha w ba3din enti shaklik tayiba w mo7tarama eza kan ana wasakt fiki mn 3'er ma ashofik ta7'ayali heya ba2a...etwakili 3ala alla w mat7'afish