من يومين كنت هموت من الألم .. كأن أنفاسى خناجر بتطعن فى روحى .. لا أقدر ماتنفسش ولا قادرة أستحمل الألم .. ده كان الصبح .. وبدون سبب .. و آخر النهار .. كنت فوق السحاب .. ماشية كأنى طايرة .. ورجليا مش لامسة الأرض ... من السعادة ... جوايا فرحة .. نفسها تطلع صرخة .. لولا وجود الناس .. لولا شوية عقل .. كنت مشيت اتنطط فى الشارع زى العيال الصغيرين .. كنت لفيت زى الدراويش لحد ما أحس إنى سبب دوران الأرض نفسها
و ده حالى على طول .. و أسأل نفسى أنا ليه كده؟
يوم تبقى النجوم قريبة وبتلمع ... ويوم بعيدة و مستخبية ورا السحاب ... يوم أشوف الدنيا بالألوان .. و كأن الربيع جه فجأة .. وأنا شجرة ورد أحمر و كل وردى مفَتح .. و يوم تبقى لونها رمادى زى خريف أكتوبر .. و ألاقينى شجرة أوراقها بتقع مع أقل نسمة هوا
أوقات أبقى البحر فى سبتمبر .. وفى ثوانى أبقى البحر فى يناير .. و احيانا أبقى الشطْ ... و اوقات أبقى مركب .. و ساعات أبقى صحرا .. وساعات أبقى واحة .. جوايا صيف و شتا .. ييجوا ورا بعض من غير تمهيد .. لِعب الصيف يحلى تحت المطر .. و وقار الشتا ييجى فى لمة صحاب فى وسط الكلام عشان يوزنه .. لما أفرح أبقى زى عيلة صغيرة فرحانة بهدوم العيد .. و اما أحزن أبقى زى ليل مافيهوش نجوم .. ساعات أبقى فى حنية الأمهات .. وساعات أبقى فى قسوة السكين .. و أبقى قطة .. ألاعب و أسلى و أضَحك وأخربش و أعض ... و أبقى عصفورة مكسورة الجناح ... و أبقى نسر جارح ما يهاب إرتفاع و لا صياد يقدر عليه .. أبقى نار تحرق ماتبقى .. أو تدفى .. وميّه تروى .. أو تغرّق .. كله على حسب الحالة .. و الشخص .. وأنا وحظى بقى .. و أحاول عقلى يغلب على الحالة .. عشان ماتبقاش ترللى خالص .. ولا اتجننش بالأوى على حد .. بس جوايا أوى ببقى هطق .. عاوزة أخرج اللى حاسه بيه .. أى كان .. ولما ابص لحالى كده مش على حالى وقت طويل أبداً ..حاجة تفرحنى فى يوم .. وفى يوم تانى تبقى عادى .. أو حاجة تحصل تخلى كل اللى حواليا منتظرين ثورة غضب منى .. ويتفاجئوا إنى فى منتهى الهدوء بحل الموضوع .. أو كلمة صغيرة تتقال .. او ما تتقالش .. تبكينى ساعات .. وبعدين يا نفسى .. و بعدين معاكى .. مش تخليكى كده عاقلة .. و أفتكر الأغنية العبقرية إللى بتوصف أحوالى :
ساعات ساعات .. أحب عمرى و أعشق الحاجات .. ساعات ساعات .. أضحك وألعب زى عصفورة ربيع .. زى النسيم .. زى النسيم ما يعدى وفى لحظة يضيع .. أضيع .. أفرح اوى .. وأضحك أوى .. واحب عمرى وأعشق اليوم إللى فات .. وساعات ساعات .. أحس قد إيه وحيدة وقد إيه الكلمة فى لسانى ماهيش جديدة .. وقد إيه مانيش سعيدة .. وان النجوم .. النجوم .. بعيدة .. وتقيلة خطوة الزمن .. تقيلة دقة الساعات .. ساعات .. وغريبة .. نفس اللى بيفرحنى ما يفرحنى .. نفس اللى بيريحنى ما يريحنى .. واحس إنى عمرى فات .. من غير ماحب عمرى و أعشق الحاجات .. كده ساعات .. وكده ساعات
و أقول معلش يا أنا .. على الأقل مش لوحدى .. و يارب يفضل عقلى غالبنى كده على طول .. أو على الأقل لحد حاجة من إتنين .. يا تبقى كل الناس جوزاء .. يا إما كل الناس تسيب الناس فى حالها .. يااااه شكلى هستنى كتير .. خلاص خليك يا عقلى غالبنى
6 comments:
بصي يا بنتي
هما كل الجوزائيين كدة
انا بعاني مع صاحبتي في كدة
و عرفت ان كلكوا كدة
لومي النجوم و الكواكب
:)
انا برج الجدي
معاناتنا اكبر
:) بس متشابهين
I should have felt that you are Gemini too :D, but you know what it's not as bad as you think ...
انتي فعلا بتعتقدي في النجوم والابراج والكلام ده ؟؟؟
طيب لما ظروفك تتغير وتكوني مبسوطة وسعيدة ..على عكس الكلام اللي بيقولو البرج بتاعك ...هيكون ايه السبب...
يتهيألي السبب ان اي معاناة احنا السبب فيها ..مش الابراج...واحنا اللي نقدر نساعد نفسنا
Epitaph:
ههههه يا عينى يابنتى صاحبتك كمان كده؟ وقعتينى ضحك بكلمتك " وعرفت ان كلكوا كده" كأننا عيانين
هههههههه
nesrina:
ايه النور ده :)and i don't think that it's bad at all ;)
salateeno:
انا مش بعتقد فى الأبراج خاااالص .. وماكتبتش الكلام ده بعد ماقريت حظك اليوم ولا حاجة
بشكل عام أنا كتبت عن شخصيتى .. انى فعلاً بجمع طرفى النقيض فى كل حاجة .. مش بس ان يبقى جوايا الحاجتين لأ .. أقصى الحاجتين ..يعنى يا اما أبيض اوى يا إما اسود ومهبب .. من هنا الجوزائية .. لكن مش عشان ابراج وبطيخ من ده
تحياتى :)
كلنا هذا الرجل يا عزيزتي
احم
أقصد كلنا على ده الحال
غالبا
جوزائيين حتى لو حمل
hi ana sara 3ala fikra ana borg el 7amal w ba7es keda kter awe ya3ni mesh el gawza2 bas ..bas mot3eb awe el e7sas da maho yab2a za3lana ya far7ana ..aw..7asa ini fahma kol 7aga wba3din ala2ini zay el 7omara w 3ala keda ba2a...
Post a Comment