عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Wednesday, February 7, 2007

رد الرسالـة

الاخ الفاضل / د ...... د تحية طيبة وبعد،، د
د أولا، أحب أهنيك على تخرجك من كلية الهندسة اللى واضح إنه من مدة مش قصيرة ... د ثانياً، بالرغم انه ممكن تكون رسالتك دى ملفتة للنظر وفعلاً بتعبر عن حال كتير من الشباب و الشابات المتخرجين جديد ... إلا إنه يؤسفنى أقولك انها غالبا مش هتحقق حاجة. أكبر حاجة ممكن تحققها رسالة زى دى لو بعتها لشركة – طبعاً ده فى حالة إن يكون مدير الموارد البشرية بتاعها شخص قلبه رهيف – إنه يعرض عليك فرصة للتدريب فى الشركة لفترة معينة بدون أى وعود ...لأصدقك القول .. لو أنا مديرة الموارد البشرية كنت أغلب الظن مش ههتم برسالتك أصلاً .. وآخرها معايا كان هيبقى زى مابقولك .. فرصة للتدريب لو ظروف الشركة والعمل تسمح.د أحب كمان أوضح لك حاجة بسيطة ... أنا ماعنديش خبرة خمستلاف سنة فى مجالى .. و أول مجال إشتغلت فيه كان مالوش علاقة خالص بالموارد البشرية .. وكل مدة عملى أصلاً لا تزيد عن سنتين أول عن آخر ... سنتين وكام شهر للحق يعنى . د طبعاً هتقول أكيد عندك واسطة ... هاقولك أيوة .. واسطتى هى الله .. و ده مش كلام رنان بيتقال فى المواقف دى .. دى حقيقة .. أول شغلانة جاتلى بالصدفة .. لمجرد إنى كنت موجودة فى وسط اتنين بيتكلموا عن وظايف فى شركة فقلتلهم " أنا عاوزة أروح أنا كمان" .. شبه غتاتة أو إحراج للناس دى .. و رحت .. و مشى الحال بفضل الله .. طبعاً ماكنتش أصلا أسمع عن الشركة من أساسه عشان يبقالى واسطة فيها .. و لعلمك كانت أول مرة أعمل إنترفيو .. و حاجة مالهاش علاقة حتى بدراستى .. خصوصاً إن تخصصى بايخ و مجالات شغله محدودة فى حاجتين تلاتة .. بس كل الفكرة انها كانت وظيفة فى مركز خدمة عملاء فطبعاً عاوزين ناس و خلاص .. وانا قلت أهى شغلانة والسلام .. الواحد يجرب ويشوف .. بس المجال بتاع خدمة العملا ده، طريق مسدود مسدود يا ولدى .. بكلمك بالحق .. مش كل الناس بتترقى فيه بسهولة ولا حتى بصعوبة .. ده غير حرقة الدم والمهانة اللى بتلاقيها من ما يسمى بعملاء .. يحسسوك كأنهم أشتروك بفلوسهم فى سوق النخاسة .. ويبقى مطلوب منك تحترم ناس عندها مركبات نقص و أغبياء و متخلفين عقلياً .. ولو كلموك عيال صغيرة مافيش مانع أبداً أنك تعملهم عجين الفلاحة بإعتبارهم برضه "عملاء" .. حاجة أى كلام يعنى .. ولعلمك كان معانا خريجين وخريجات من هندسة .. وكتير كمان. مش عاوزة أحكيلك قصة حياتى بس بحاول أوصلك صورة .. عن نفسى كان كل ما ييجى حد جديد ويتدرب معايا .. كنت أقولهم يا جماعة الشغلانة دى مالهاش مستقبل .. خدوها خطوة لحاجة أحسن .. إستغلوا الفلوس فى انكم تاخدوا كورسات و تتعلموا حاجة تنفعكم فى شغل حقيقى .. أو حتى للى عايز يحوش و يعمل مشروع خاص. د وسؤالى بقى ليك ... مؤهلاتك إيه غير إنك خريج هندسة؟؟ أخدت تدريب فى الصيف فى أى شركة أو مكتب هندسى؟؟ إيه مؤهلاتك الشخصية اللى تخليك تعدى من إنترفيو؟ يؤسفنى أقولك إنه لو ليك نفس السلوك الواضح من رسالتك او الــAttitudeزى ما بيقولوا تبقى إنت فى مشكلة .. و أتمنى إنك يكون معاك لغة .. صدقنى دلوقتى إللى معاه إنجليزى بس مابقاش ميزة يعنى .. الشركات اللى عليها القيمة بقت بتدور على لغات تانية مع الانجليزى لانها بتدور ازاى تفتح مجالات بيزنس فى دول مختلفة اللغات .. د طبعاً فى كورسات غالية جدا جدا .. وبفلوس بالعبيط ... وانا مش بقولك روح إسرق ولا بَيع أهلك اللى وراهم واللى قدامهم عشان تاخد كورس ولا اتنين ... لكن فيه بدائل .. ممكن ماتكونش بنفس هيبة كورسات الجامعة الامريكية مثلا ولا كامبريدج .. بس على الاقل هتديك خلفية تقدر تستند عليها لو حد سألك .. ده غير إنها هتقرب المسافات فى انك تاخد كورس غالى بس ماتبقاش مضطر تبدأه من الصفر .. ممكن تبدأ بعد الصفر بخطوتين تلاتة .. وتبقى وفرت جنيهين تلاتة .. و بغض النظر عن أى توجهات أو آراء ذات شكل سياسى مضاد لأى حد أو أى نظام .. إلا إن فعلا جمعية جيل المستقبل بتقدم كورسات كويسة .. على الاقل لو مش معاك لغة و كمبيوتر كويسين هتتعلمهم .. وبيدوا كورسات متخصصة .. إحنا كان معانا ناس زمايلنا فى الشركة اللى بقولك عليها دى .. كانوا بياخدوا كورسات – بس مش فاكرة ايه بصراحة – مع الجمعية .. ولانهم تفوقوا فيها جاتلهم منحة تدريب فى اليابان تبع شركة كبيرة جدا .. وبعد مارجعوا جاتلهم وظيفة هايلة تبع شركة كبيرة فى مصر .. و هما ناس زيى وزيك وماعندهمش واسطة ولا غيره و كانوا مطحونين معانا فى نفس الشغلانة الزفت .. و لعملك كانوا بيحاربوهم فى الشركة و مش عاوزين يدوهم إجازة عشان يروحوا المنحة دى .. يعنى كانوا عاوزين يضيعوا مستقبلهم .. وهما تحدوهم و قلبوا الدنيا وراحوا برضه و لما جم ادوهم استقالاتهم على الجزمة القديمة و راحوا شغل أفضل الحمدلله. د و كمان وزارة الاتصالاات بتعمل منح كل فترة و بتدى كورسات و تدريب كويس والله .. غالبا هى سكة تتنهب بيها فلوس على حس التدريب و الحاجات دى بس طالما هنطلع منها بكلمة تبقى بركة يا جامع .. وفيه حاجة إسمها مركز تحديث الصناعة فى مبنى إتحاد الصناعات على كورنيش النيل، لسه عاملين برنامج للأفراد بيدوا تخفيض على سعر الكورس 50% بحالهم، لأى حد و أى كورس .. روح إسأل مش هتخسر حاجة. د و بعدين إحنا لما طلبنا ناس بخبرة .. عاوزينهم عشان يمسكوا مركز إدارى .. مش عاوزينه ييجى يصور ورق يعنى .. وإنت سألت عن الناس المتخرجين جديد يجيبوا خبرة منين .. هو انت عاوز أول ماتشتغل تبقى مدير؟؟؟ هى دى الوظايف اللى عاوزة خبرة .. غير كده اللى يدور يلاقى .. ممكن مايلاقيش شركة معروفة ولا مرتب خرافى .. لكن يقضيها كده شوية لحد ما ياخد شوية خبرة .. إرمى سى فى فى كل مكان يخطر على بالك .. دور على كورسات بمنكاش لحد ماتلاقى حاجة مناسبة فى المحتوى و فى السعر .. دور على اى فرص تدريب فى اى شركة او اى مكان .. هتقولى بلدنا مافيهاش شغل .. هقولك طب يعنى والناس اللى لقيت شغل دى لقيته فى الماتريكس!! لازم الواحد يكون حرك حبتين .. وجِبّل تلات حبات .. يعنى ماتقولش ده كخ و ده يع غير لما تلاقى حاجة أفضل منه .. أى حاجة تكتبها فى السى فى أحسن من مافيش خالص ... والله مش بكلمك من برج عاجى ولا حاجة .. بكلمك من واقع شفته و عشته يا اما بنفسى يا اما مع زمايلى. و لعلمك الشغل اللى انا فيه دلوقتى جابوا السى فى بتاعتى من نفس الموقع اللى حاطين عليه الاعلان اللى انت شفته يعنى لا المدير قريبى و لا صاحب الشركة يبقى جوز خالتى بالعكس ماكانش عاجبه السى فى بتاعى اصلاً. و لو انت مش مقهور اوى على البكالوريوس شوف انت موهوب فى ايه واشتغل فيه .. مبيعات، تسويق، علاقات عامة، لغات .. البلد دى مابقيتش بتاعة شهادات خلاص .. بقت بتاعة حركات .. مش بلدنا بس عشان ماظلمهاش .. الدنيا كلها بتاعة حركات .. وانا مابقولكش روح إشتغل فى النظافة ولا اى شغلانة احنا مابنقدرهاش فى ثقافتنا المصرية و نبص لها على انها يع وكخ .. لكن بقولك دور على حاجة تناسب قدراتك مش بس شهادتك .. ودور على اى حاجة تنمى قدراتك و تحسنها ... تعرف الدكتور إبراهيم الفقى؟ راجل مشهور و محاضراته فى التنمية البشرية بيندفع فيها فلوس بالعبيط .. رغم إنه خريج سياحة وفنادق و بدأ بغسيل صحون لحد ماوصل بقى مدير فندق خمس نجوم .. و بره كمان .. فى بلاد لو انت مابتدورش على نفسك فيها ماحدش هيدور عليك .. لو كان فضل يقول كخ ويع كان زمانه يادوب بيحاول يشترى عربية زيط على رأى سمير غانم ... و هقولك مثل بسيط .. لو انت قاعد فى حته و فيه ناس عمالة تكنس تراب كتير و التراب بيعفر عليك .. هتفضل قاعد فى مكانك ولا هتقوم و تدور على مكان تانى بعيد عن التراب؟؟ هكون سعيدة لو تلقيت منك رد على ايميلى الموجود هنا او حتى على ايميل العمل .. و ياريت ماتبعتش الرسالة بتاعتك دى لاى شركة تانى .. ماتقفلش على نفسك بيبان و الحمدلله انها جت فيا انا المرة دى .. دعواتى لك ولى ولمن مثلنا بالتوفيق ان شاء الله .. و يارب قدرنا نعمل بآيتك الكريمة "إن الله لا يضيع أجر من أحسن عملاً" او حتى المثل "إسعى يا عبد وانا اسعى معاك" .. ربنا يوفقك و يوفقنا جميعاً إن شاء الله. د
د
*******************************
د
مفاجأة: لما مدير الموارد البشرية قرا الرسالة بتاعة الأخ (.....) قالى التالى: د
د" خسارة، ضيع على نفسه فرصة، إحنا فعلاً محتاجين خريجين جداد .. بس أسلوبه ده بوظ الدنيا"د
!!!!!!!!!!!!!!!!!!!!!!!!!!!!!!!
طبعاً ماعنديش تعليق!د

6 comments:

tazart said...

النص رائع ، و العالم مقرف

ME said...

أشكرك على رأيك فى النص .. و أؤيدك على رأيك فى العالم

أُكتب بالرصاص said...

ربنا يفتح عليك

كلامك كله سليم

ودرس اتمنى تعميمه على كل الطلبة والخريجين الجدد
لانهم مش عارفن ازاي يبدأو مستقبلهم

بجد لازم نشر هذه المقالة
حتى يستفيد
اهل الاختصاص

كما ان المفاجاة في الاخير

كانت مدوية


ان ان ان



والله قلت
سبحان الله
يعني لو كان عنده سنس التعامل او المراسلات
او الفهم

كان زمانه شغال

ME said...

هنقول ايه بقى؟! و اهو على رأى اللى بيقول "لسانك حصانك" .. نصيبه بقى

Mahmoud said...

الله ينور عليكي يا أستاذة..
رد متين وفي السليم.. وهو مش مفروض يزعل، مفروض عتبرها تجربة ويتعلم منها ويذاكرها كويس..
الشخص الوحيد اللي مش ممكن يغلط هو الشخص الميت -مش أخو البحر الميت- وان شاء الله يستفيد من التجربة وتزيده مثابرة وتوصله للنجاح.

من جانب آخر
موضوع كيفية التقدم لوظيفة وكيفية كتابة سي في مقنع وجيد ومثل هذه الأشياء هي كلها حاجات ضروري جداً الناس تهتم بيها وتقراً وتتعلم ازاي بتتعمل.. إزاي تقنع واحد بنفسك.. وازاي تقدر تعبر عن إمكانياتك وتظهرها..
لفترات سبقت كنت مسئول عن تلقي سي فيز من الناس وفحصها وتقييمها وكنت باجد مهازل زي ما بتقولي فعلاً..
للأسف أعتقد وبدون مبالغة ان نص مشكلة البطالة أو أكثر سببه العاطلين عن العمل نفسهم وليس قلة الفرص وليس سوء التخطيط ولا الظروف التي تعودنا الحديث عنها وترك الملائكة الأبرار العاطلين دون أي لوم أو عتب.. فوقوا

أعتذر عن الإطالة..
وبس خلاص

Anonymous said...

hi ana sara ra2yik gamid awe w tari2tik kaman ana ma3rafsh howa all eh bas enti 3arfa kol el shabab el lesa met7'arag 3ayez y7'rog yshta3'al fi a7san wazefa mawgoda w mesh 3ayzen yt3abo fi 7aga