يجيله إتنين تاج مرة واحدة :) د
إتنين من أكثر الناس إحتراماً و كانت النت سبب فى إنى أتعرف عليهم .. و أغلس عليهم و أقول إنهم صديقاتى
شـغـف و عـلا
كل واحدة هادتنى بتاج فى نفس الوقت تقريباً .. نفس الوقت اللى أنا فيه شبه مش موجودة فى بيتنا غير للنوم .. و فى الشغل الدنيا مقلوبة و فعلا ماكانش عندى غير يادوب كام دقيقة أعرف أرد على التعليقات الجميلة جداً اللى فرحتنى و دمعتنى على البوست اللى فات .. فأنا بعتذر ليكى يا شغف و انتى يا علا على التأخير بس والله كان غصب عنى.د
و طول الوقت ده و أنا عماله أفكر بجد فى خمس حاجات ماحدش يعرفهم عنى ..... و إكتشفت إنى بيج ماوث زى ما بيقولوا و كل الناس تقريباً تعرف عنى كل حاجة ... تقريباً ... بس هدعبس على حاجة مستخبية. د
**************************************************************************
د
الأول
د
د من علا: د
د
س: هيحصل إيه لإيميلك لما تموت؟
ج: بتاع هوتميل هيتقفل .. وياهو ماعرفش إذا كان بيتقفل بعد فترة ولا ايه .. و جى ميل هيقعد يزود فى ميجابايتس لحد مايفرقع .. و عموماً أوعد جميع الناس اللى ممكن يهمهم معرفة خبر موتى، إذا عرفت هموت إمتى هسيب اوتوماتيك ريبلاى على الميل زى بتاع الأجازة، بس ده يبقى بتاع الوفاة :) ....... بايخةةةةة :) د
س: إديت الباس وورد لحد قبل كده؟
ج: أيون
س: لو آه كانت طبيعة علاقتك بيه ايه؟
ج: كان زميل فى العمل عنده سايبر كافيه .. وكنت عاوزاه ياخد صور ابن صاحبتى اللى بعتتهملى على الميل عشان ينزلهملى على الموبايل .. لأنى ماعرفش أنزل الصور من الميل على الموبايل و ماكانش عندى دى اس ال ساعتها .. وبعد ما عملهملى غيرت الباس وورد.د
س: اســــــمك ايه؟
ج: همممممم .. ولو إن ده هيبوظ غموضى التدوينى زى ما بيقولوا .. بس فعلاً كذا حد سألنى على إسمى .. و كذا حد تصور إن إسمى حبيبه زى ماهو فى مكتوب فى عنوان البلوج ... و عشان ننهى الأزمة دى و نوفر على الرفاق المتسائلون تساؤلاتهم ... إسمى آيات ... بس بالله عليكم بلاش حكاية آيات الحمصانى دى لحسن زهقت منها تماماً .. كل حد يسمع إسمى يقولى "آآآه زى آيات الحمصانى؟ نياههاهاها" و يفكر نفسه شخص خفيف الروح بيتعاجب!! خصوصاً إن الست توفاها الله من فترة طويلة الله يرحمها و انا لسه شابة فى عز شبابى .. ماتفولوش عليا يعنى :)د
س: اسم الدلع المشهور وسط اصحابك؟
ج: أكتر إسم هو توتة .. وده أكتر إسم بحبه بجد .. وفيه إسم بابا الله يرحمه كان بيقولهولى بس هقوله فى تاج الخمسة
أما حبيبة فدائماً هو النِك نيم بتاعى من ساعة ما بدأت أعمل أى شىء على النت .. وده مرجعه إنى نفسى فى يوم من الأيام أبقى أم حبيبه ... يااااااارب.د
طبعاً فيه أيوته و أوتى و أوته و تُته و يوته و يُته و بطاطا .. و الأشهر أيام الجامعة و حاليا لما ببقى صاحيه من النوم بطوط :) .. لأنى ببقى شكل بطوط بالظبط و هو صاحى من النوم :))) كفاية فضايح بقى د
س: عمرك؟
ج: 26 سنة و 8 شهور و 18 يوم بس مش عارفة و كام ساعة :P د
س:برجك؟
ج: الجوزاء ... إوعى وشك ... أجدع ناس ولامؤاخذه .. برج مارلين مونرو و جون كينيدى فمش عاوزة كلام كتير :) د
س:شخصيتك نوعها ايه؟
ج: جوزاء برضه .. يعنى جوايا كل شىء و بتطرف .. بمعنى إنى لما أبقى طيبة أكاد أكون هبله - وده نادر الحدوث - و لما أبقى شريرة أبقى زوزو نبيل على زوزو ماضى على علوية جميل على نجمه إبراهيم :) ... بشكل عام و على حسب أقوال الشهود إنى شخصيتى قوية قيادية ذات دم حامى زيادة عن اللزوم فى بعض الأحيان مما يستتبع بالضرورة العصبية .. عاوزين تانى؟! حاسمة بشكل قوى .. ماحبش النهايات المفتوحة للأشياء .. شعارى إقطع عرق و سيح دم و أقرب طريق بين نقطتين هو الخط المستقيم .. بتفرق معايا الحاجات الصغيرة بشده .. زى كلمة او تصرف بسيط ممكن يطلعونى السما و ممكن يخلوا نفسيتى فى سابع أرض .. الحوار هو طريقتى فى تناول اى شىء اى كان .. و أحب أتعلم دايماً حتى لو من حد أصغر منى سناً مافيهاش مشكلة أبداً بالنسبة لى .. سهلة التكيف مع معظم الأشياء الجديدة -بإستثناء مدينة 6 أكتوبر اللى شكلى هفضل مش طايقاها إلى الأبد - شخصيتى دى مرت بكثير من التحولات و التعديلات فى مختلف مراحل حياتى بس دايما كان فيه محور ثابت .. كفاية كده ولا إيه؟ وياريت لو حد قرا الكلام ده وكان يعرفنى بصورة شخصية ولو شوية ضغيرين ممكن يقول إنطباعه عنى أنا بجد بحب أعرف رأى الناس فيا .. حتى لو مش متفقين فى حاجات كتير بس بحب أعرف إدراك الناس ليا شكله إيه.د
س:مجال دراستك؟
ج: لو المقصود الدراسة الجامعية فأنا خريجة آداب قسم علم نفس ... إوعى وشك برضه ... وبعد ما بدأت شغل سمعت عن حاجة إسمها الموارد البشرية، فعجبتنى و قررت أدرسها، و عملت دبلومة دراسات عليا فى الجامعة الأمريكية فى التخصص ده، وبكمل دراسة فى نفس المجال بورش عمل و كورسات .. وربنا يكرمنى ان شاء الله و أورث قريبنا اللى طول عمره عايش فى المكسيك و أروح أعمل الـ إم بى إيه لأنى مش هلاقى فلوس أعمله بيها غير بالطريقة دى :) د
س: السفر بالنسبة لك؟
ج: حلم نفسى يتحقق بشدة .. لكذا سبب .. سبب منهم هقوله فى تاج الخمسة .. وبقية الأسباب معروفة .. السبع فوايد و لأنه بيغير نظرة الإنسان للأشياء و للناس وللعالم .. بجد أكبر تجربة تعليمية هى السفر .. و حاليا نفسى ألاقى شغل فى حته بره مصر بإعتبار إن دى الطريقة الوحيدة اللى ممكن أسافر بيها .. ده لدواعى الشحاته يعنى .. إحم ... لأنى مامعاييش فلوس أسافر سياحة ... كبيرى بالفلوس اللى معايا هيبقى جمصة البلد :) د
س:المود بتاعك؟
ج: طبعاً متغير بشكل مستمر .. بس الأساس المبنى عليه كل موداتى و نظرتى للحياة هو الوحدة ... مهما كان فيه ناس وفيه لمة .. فيه وحدة .. بإتساع السماء .. وده بيخلينى لما بتكلم بجد ببقى جد أوى و كئيبة .. وده بحاول أغطى عليه دايما بأى طريقة لأن مش كل الناس عندها القدرة إنها تواجه كم الكآبة و السواد المستخبى جوه عقلى .. فاقعد أهزر او اقول أى إفيه لما ألاقى الجد زاد و هيتقلب لكآبه .. هى بس صاحبتى بتاعة البوست اللى فات اللى بنبقى فاهمين كآبة بعض حتى من غير كلام .. وبرضه بنقعد نتريق او نقول اى حاجة تخف حدة البؤس اللى بيكبس علينا فى آخر الكلام .. وبناء على ماتقدم أحب أقولكم نكنة .. مرة واحد راح لبقال قاله عندك حلاوة قاله لأ و هو عنده جوه .. نياههاهاهاها
س:وقت فراغك بتعمل فيه ايه؟
ج: أول حاجة لازم أقضى معظمه مع ماما .. حتى لو قعدنا ساكتين .. ماهو مش معقول أبقى سايباها طول النهار لوحدها تكلم خيالها و بعدين لما ابقى فى البيت أسيبها لوحدها برضه .. بس لما بتنام بقى ممكن أقعد ع النت أو أقرا .. وقبل النت و طول حياتى أقرب صديق ليا بجد هو الكتاب .. أحب القراية جداً و زعلانة لأنى ماعنديش ليها نفس الوقت زى زمان، و زمان برضه كنت برسم أحيانا بس دلوقتى بح خلاص .. و عموما أنا زى أى جوزائى .. متعددة الهوايات سريعة الملل .. بس القراية فوق كل هواية و كل ملل.د
س: الاكلة المفضلة؟
ج: يوووه كتشيييير .. المكرونة بالبشاميل، الرقاق، الكشرى بتاع ماما، أكل الشارع، الحلويات الشرقية والغربية و التورت و الجاتوهات، والشيكولاتة و البسكويتات ... بشكل عام أحب كل الأكل ماعدا الخضار .. مالوش طعم خالص بالنسبة لى مهما كان مين عامله ... وماحبش البقدونس والشبت و الكرفس و الفلفل الأخضر عشان بيغيروا طعم الأكل .... جوعتينى يا علا ... :) د
س: الصفات اللي خدتها من بابا؟
ج: اساس شخصيتى كله بابا .. مع فرق التطبيق و التنفيذ .. هو كان أهدا منى بكتييير وكان قليل الكلام و أنا طبعاً رغاية .. بس طول عمرنا انا وهو نفهم بعض بالنظرات ويقول الحاجة وانا افهمها و نضحك وكل اللى ممكن يكونوا موجودين يبقوا مش فاهمين اى حاجة .. وبابا ماكانش بيعرف يحفظ ولا يقول نكت نهائى .. بس أهم حاجة إنى أخدت منه قدرتى على التنبؤ بتصرفات و أهواء البشر .. الصفة اللى مبوظة عليا حياتى فعلاً بس سعيدة جدا بيها. ماكانش عصبى خالص بس كان ينطبق عليه حرفياً إتق شر الحليم إذا غضب و أنا لو مازعقتش معناه إنى محوشة مصيبة للشخص اللى انا فوتله ده .. النظرات المعبرة بقوة.د
س:الصفات اللي خدتها من ماما؟
ج: الفرحة بالكلمة الطيبة و إن حد يفتكرنى فى عيد ميلادى إن شالله بمكالمة .. لو زعقت أصفى على طول .. الحنية (يعنى، لو كان فيه سبب لظهورها أصلاً) الضحك و الإفيه الحاضر غالباً .. قوة الذاكرة - و إن كنا إحنا الاتنين ابتدينا نفوت دلوقتى :) - برضه النظرات المعبرة .. و زى ماما أحب أدلع نفسى بحاجة حلوة كل مدة خصوصا لو نفسيتى مش ولابد أروح اشترى لى كتاب ولا حاجة تتلبس أروح منشكحة على طول و تجى لى روح معدنية :) .د
س: أكتر 6 حاجات بتكرهها؟
ج: 6 بس؟!! طب حاجات بكرهها فيا ولا فى الناس ولا فى ايه؟ بشكل عام؟! طيب ... بكره الإستغباء و الإصرار على عدم الفهم و تحكيم الرأى فى الغلط البين ... أكره القهر و الظلم و مبدأ لازم أديك على دماغك بما إنى أقوى منك .. الدم البارد و الناس اللى على قلبهم مراوح دول بيشلونى و يخلونى أخرج عن شعورى ... إنى أشوف حد بينضرب أو بيضرب حد قدامى، بجد مابعرفش أنا بعمل إيه و أبقى بتنفض من الغضب و ممكن أتخانق مع الشخص اللى بيضرب ده وأبهدل الدنيا بدون اى وعى .. أكره الناس اللى تلف و تدور و ترسم و تغنى و تكدب على بعض لأى سبب و اللى بيعمل كده معايا بخليه يصوت بالبلدى إبن سلطح بابا ... أكره التعالى بدون سبب او مناسبة و فى المقابل لما واحد أى كلام يتنطط على إنسان محترم و أكبر منه مقاماً، من الآخر لازم كل واحد يحفظ مركزه و يحترم نفسه عشان الناس تحترمه من غير غرور ...مش دول كده 6؟ فيه تانى لو حد عاوز يطلب رقم التوصيل السريع للمنازل. د
س:اكتر 6 حاجات بتحبها؟
ج: هما برضه حاجات كتير .. نقول منهم .. يوم حلو مع صحبة جميلة أو فى مكان بحبه مانساهوش أبداً ... أى حيوان يكون شقى و ليه شخصية مرحة وماكونش بخاف منه أبقى مبسوطة جداً و خصوصا القطط ممكن ألاعب قطط الشارع اساسا من كتر ما بحب القطط .. أحب أشوف الناس اللى بحبهم فرحانين بحاجة أنا عملتها عشانهم سواء كانت مفاجأة أو كانوا طالبينها منى اعملهالهم ... أحب لما أسمع حد بيقول عنى كلمة كويسة من ورايا و توصلنى بالصدفة، بحس بمسئولية جميلة .. بحب كتبى و أوضتى و حاجاتى الصغيرة و عرايسى و الحاجات اللى ارتبطت بيها من زمان ... بعشق النيل من غير أى اسباب معروفة بالنسبة لى خالص، بحس كأنى كنت عروسة نيل فى يوم من الأيام مثلاً .. وبحب أهلى وبلدى وحبايبى والمجتمع والنااااس.د
س: الشغل بالنسة لك؟
ج: ياسلام .. لو كنت اتسألت السؤال ده سنة 2005 أيام شغلى القديم كنت قلت كلام بذىء بصراحة .. لكن دلوقتى أنا بشتغل حاجة بحبها جداً و اللى بعمله شايل إسمى انا بس فحاسه بالإنجاز و أثره بشكل مباشر ودى الطريقة الصح اللى الواحد يبنى بيها مستقبله .. ده غير طبعا إنه مصدر دخل مستقل بيؤمن إستقلالية و حرية كبيرة جداً كل الناس محتاجاها .. و أهو خطة بديلة عن أى وحدة دائمة محتملة الحدوث مستقبلا ولو لفترة ... حد فاهم حاجة؟! د
س:ايه الكمبيوتر والانترنت بالنسبة لك؟
ج: عالم قريب جدا وواسع جدا .. باتساع الأرض .. فيه كل حاجة .. تعليم مطلق .. إنشغال محبب .. أصحاب جداد عرفتهم وكانوا من أحسن الناس اللى ممكن الواحد يعرفهم فى حياتهم .. دنيا بحالها.د
د
طبعاً التاج ده عرفكم قد إيه انا رغاية موت .. ولا أحمد الحداد فى زمانه .. ويارب يا علا ماتكونيش بتلعنى اليوم اللى قررتى تمررى لى التاج ده فيه من كتر رغيى :) .. ربنا ما يحرمنيش من تاجاتك ولا يحرمكيش من رغيى .. :) د
د
و إلى لقاء فى التاج الثانى : تاج الخمسة
د
7 comments:
ياسلااااام
انا كنت عارف انك رغاية
بس بعد التاج ده
اكتشفت
انك
رغاااااااية قوي
:))
بس بصراحة
قرأت كل حرف وكل كلمة
عارفة ..
اصبحت الان كتاب مفتوح
بابي فيس
ربنا يكرمك يا ايات الحمصاني
ويخليلك مامتك
ويعلي مراتبك
قادر يا كريمممم
انت فين من زمان
اصحي... اصحي.... اصحي... الدنيا تتغير
والله انك بجد انسانة فريدة من نوعك :p
ايه يا بنتي ,, دي اطول اجابة اقراها للتاج ده هههههههه
ومع ذلك انا قرأته بدون ملل كلمة كلمة
انما مين ايات الحمصاني :)
وانا معاكي 100% في الخطة البديلة ,,
الا صحيح ,, هو مش المثل اساسا "الشقي لما يسعد" ولا دي نسخة تانية منه
مممممم
ده انا حتى مش فاكرة التكملة بتاعته
ماااا علينا
شكرا على اجابتك بجد ,, بتمنى انك تكوني استمتعتي بيه وبكتابته زي ما متعتينا بالقراية
سلام يا ام حبيبة :)
أكتب بالرصاص:
أنا رغاية؟!! مين قال الكلام ده؟ دانا أكتر حاجة أكرهها الرغى و الرغايين !! ههههههه .. مانحرمش من دعواتك الحلوة أبداً
أغلو:
أنا صاحية أهو .. دانا تقريباً مش بنام :) بس الدنيا بتتغير حتى وأنا نايمة ... تحياتى
علا:
أشكرك يا غالية على إهتمامك .. و معلش طولت عليكى بس بيتهيألى انتى كده حرمتى تبعتى لى تاجز تانى صح؟ :)
آيات الحمصانى يا ستى كانت مذيعة فى البرنامج العام على الراديو وكانت بتقدم برنامج الصبح بدرى اسمه طريق السلامة كان بيهتم بإرشادات السلامة على الطريق .. الله يرحمها بقى .. وإحنا فعلا بنقول المثل كده الفقى لما يسعد .. بس تصدقى إن نسختك منه أحلى .. ويارب يا غالية ربنا يسمع منك و أبقى أم حبيبة .. تحياتى و ماتغيبيش عليا
إسم جميل ... مين آيات الحمصاني بالمناسبة؟
abd el rahman:
إقرا التعليق اللى قبل ده هتعرف مين آيات الحمصانى :) .. و أشكرك على ذوقك
hi ana sara mesh momkin enti shabahi fi 7agat kter awe aw ymkin ana nfsi ab2a kida ..ana ba7eb at3alim awe ma3a en kol el nas eli 7awalaya bey2olo 3ani 3'abiya awe w kol asatziti fi el madrasa kaman w da akid l2ana makontsh shatra 7'ales bas el7ekaya di meday2ani awe awe awe aktar ma ttsawari bekter w ana badres 7aga maba7ebhash wda tab3an l2an magmo3y kan so3'ayar awe w mesh hatsada2i ana nifsi adres eh? adab 3elm nafs l2ani kont ba7eb el 3elm nafs awe ayam el sanawe w gebt fih a3la darga fi 7ayati 47,5 el mohim eni 7asa enik shabahi w di 7aga mfara7ani ..yarab tfara7ek enti kaman..ana borg el 7amal
Post a Comment