عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Tuesday, August 21, 2007

تصاريف اللغة

من يومين كنت راكبة الميكروباص و مروحة على بيتنا بعد يوم ما يعلم بيه الا ربنا ما بين شغل وعزاء وحاجة كده غلب .. المهم .. طلعت أسرة مصرية سعيدة مكونة من أب و أم و شاب (حوالى 19 سنة مثلاً) و فتاة (حوالى 17 سنة) اتقسموا على كنبتين الأب قعد فى النص بينى و بين واحد راجل تانى وبقية اسرته قعدوا فى الكنبة اللى قدامنا ... و منتهى الرغى بقى ما بينهم هما الاربعة بصوت عالى و بيتناقشوا غالبا فى موضوع سفر قريب - غالبا عمرة - و عمالين يكلموا بشرية كتيرة كده على تجهيزات و باسبورات و اوراق .. قلت هى الركوبة باينة من أولها .. أُماااال .. حاكم فيه ركوبات كده تبقى باينة انها هبل من اولها لآخرها و تلاقى بقى الركاب اللى بيرغى فى التليفون بصوت عالى، واللى -زى الأسرة دى - بيحبوا يشركوا عامة الشعب فى حواراتهم العائلية، وعشان الحكاية تكمل، تقوم تلاقى السواق كمان أهبل طاير على سرعة 140 مثلا وعمال ياكل مطبات ولا كأنه فى لعبة باكمان والمطبات دى هتديله حياة زيادة و على ما يسمع ان فيه حد نازل فى مكان يكون عداه بحوالى 12345467 متر وهكذا .... وده كان الحال فعلا و تقريبا ماكانش فى حد ساكت فى العربية غير انا و الراجل اللى قاعد بعد الأب معانا على نفس الكنبة .. قلت طيب .. آدى النومة بقى باظت والواحد هيفضل قاعد يسمع زعيق وخناق طول السكة وبديت ألوى بوزى و قريفت. د د
د و لأن ربنا رحيم بعباده، ماحبش ربنا انى اقريف طول السكة و أسمع لى نكتة تفرفشنى حبه د
د فيه تصليحات حاليا على المحور طبعا مطلعة روح اللى خلفونا سواء كنت نازل للمهندسين او جاى منها لانهم ببساطة قسموا الطريق المتجه ناحية أكتوبر لمسارين رايح جاى عشان الطريق اللى بيبقى جاى من ناحية اكتوبر للمهندسين هو اللى فيه التصليحات .. مش مهم، احنا واخدين على كده .. صحيح احنا داخلين على رمضان و المنطقة اللى فيها التصليحات دى مسافى كبيرة جدا و تسببت فى زيادة الوقت المستغرق من و الى مدن مابعد المحور ومدن ما قبله بحوالى نص الساعة فى غير اوقات الذروة .. الشىء الذى يستلزم بالضرورة ان فى ايام رمضان الناس هتقيم على المحور وهنعيد تصوير فيلم إشارة مرور بس بدل ساعات الموضوع هياخد طول مدة الشهر الكريم تقريباً .. بس عادى، وايه يعنى؟! المهم الن الطريق يتصلح و يبقى من غير نُقر و حفر تقسم اجدعها آكس فى أجدعها عربية .. وكمان لما الناس هتبات مع بعضها على المحور طول وقت الصيام .. تخيل بقى مدى التقارب اللى هيحصل بين الشعب وبعضه .. و تخيل بقى الروحانيات اللى هنتفرغ لها بدل ما بنقضى طول الوقت فى الصيام يا بنتخانق مع بعض وكل واحد يقول للتانى " ابعد من وشى الساعة دى .. انا صااايم" يا اما بنقضيها نوم و فرجة ع التليفزيون بعد الفطار ... يعنى بصراحة الجماعة القائمين على هذا المشروع الجبار حسبوها من كل ناحية .. يصلحوا المحور (هأو) و يقربوا مابين فئات الشعب و بعضهم و كمان يساعدوهم يقربوا من ربنا بدل ما يضيعوا حسنات الشهر الكريم فى الخناق والتليفزيون .. جزاهم الله كل خير بصراحة وانا بوجه لهم شكر وتقدير من كل قلبى .. و بالمناسبة التصليحات دى قالوا - و العهدة على الراوى- انها هتستمر 6 شهور .. و زغردى ياللى مانتيش غرمانة هو احنا ورانا حاجة ... د د المهم بقى انا بحكى كل الحكاية دى ليه ... عشان إذ فجأة فى وسط الحوار العائلى الشيق اللى كان داير ما بين أفراد الأسرة الظراف اللطاف طلع الشاب فجأة و قال لأخته ايه:د
د د د-" شفتى اللى مكتوب ع اليافطة؟" د د
د د-" آه شفته، دى حاجة تكسف والله .. لسه كنا بنتريق ع الموضوع ده انا و (مش عارفة مين)" د د
د أنا طبعاً فقت ... يافطة على المحور "مكتوب" عليها حاجة تكسف!!!!! اليفط عادة بيبقى عليها "صور تكسف" لكن مش كلام .. اصل مين فاضى يقرا ولا بيلحق أصلاً يقرا وهو ع المحور فى مناورة عسكرية انتحارية ما بين عربيات ملاكى وميكروباصات و نقل ومقطورة والشاطر اللى ينفد حى .. فقعدت ابص كده على اليفط .. و أبوهم كمان سألهم "يافطة ايه دى اللى تكسف؟" فالولد شاورله على يافطة بتاعة إرشادات طريق حاطينها الناس اللى بيشتغلوا فى التصليحات عشان ينبهوا الناس للإصلاحات و الطريق وكده.د د
د اليافطة مكتوب عليها ايه بقىىىىىى ...... د د
د إحذر ... مقب صناعى د د
د د"بالذمة مش حاجة تكسف يا بابا، بقى المقاولين العرب تكتب يفط غلط وماحدش ياخد باله من الغلطة وما يصلحهاش ويفضلوا سايبينها كده فى الطريق، حاجة تكسف فعلا" د
د د د!!!!!!!!!!!!!!!!!!!!!!!!!!!!!!!!!!!!!! د د
د أنا التفت له كده .. بحاول استوعب هو بتكلم جد ولا بيهزر .. ولما لقيته بيتكلم جد فكرت أفهمه ان الوصف اللغوى الصحيح واللى سمعته من كذا شخص من دارسى اللغة و المهتمين بيها سواء فى الراديو او فى الجرايد للشىء اللى اتعودنا نسميه مطب صناعى هو مقب .. لأنه ببساطة "قابب" لفوق وعالى، انما المطب لازم يكون منخفض فالمطب منخفض والمقب مرتفع .. يعنى المقاولين العرب كتبوا الكلمة الصحيحة للحاجة اللى هما بيعملوها والناس بتفهم و زى الفل وكتر خيرهم انهم يهتموا بالمسميات اللغوية الصحيحة للأشياء يعنى .. د د
د لسه انا بقى هفتح بقى اقوله الكلمتين دول .. راح الراجل اللى قاعد جنب الأب قاله " ماهو كده صح، هما مش غلطانين" .. طبعا تنفست الصعداء ان فيه حد عارف الصح وانه اتشجع ورد عليه بدل الواد مايبقى فى السن ده و بالبلاهة دى، و قلت الحمدلله ماطلعتش الركوبة هبلة زى ماكنت متخيلة .... و اديتلهم ودنى بقى عشان اسمع شرح الراجل للكلمة عشان يفهم الولد غلطه ............................ د
د
دد الولد: صح إزاى يعنى؟
د الراجل: ايوة مقب هى الصح ولو كانوا كتب مطب كانت بقت غلط لغوياً
د الولد: ازاى يعنى؟ مش ده مطب اللى هما عاملينه ده؟ هما كاتبينها غلط
د الراجل: لا ... كاتبينها صح .. لأنهم عاملينه على المحور ..................د
د
أنا: (!!!!!!!!!!!!!!!!!!! و عدم فهم) د
د الولد: (تعبير بلاهة مستشرى فى وشه و عدم فهم)د
د الراجل: كلمة مطب دى تتقال على المطب اللى بيتعمل فى الشارع العادى اللى هو تحت .. لكن مادام احنا على كوبرى عالى زى المحور فتتكتب مقب .. المطب للشارع السفلى و المقب للشارع العلوى اللى زى المحور ...................................................... د
د
د
د خلصت النكتة
دد و العاقبة عندكم فى التصليحات الجاية .. ولا عزاء للغة العربية المسكينة اللى اتشحورت زى كل حاجة فى الدنيا ما اتشحورت على ايدين الناس حبه و ايدين الزمن حبه د د

11 comments:

Mohaly said...

Actually u can tell it as a funny joke, it is a pity that is a reality!

Bella said...

حلو جدا البوست

علاقة الناس باللغة العربية اصبحت مشوهة جدا وعندهم عدم رغبة اصلا في معرفة الصح

على الاقل هذا الشاب لفت نظره الكلمة حتى لو كان اعتبرها خطأ

لكن الكثير من الاعلانات بها أخطاء رهيبة وتشويه للغة ولا يلتفت احد اصلا

اما تفسير الرجل العلامة الذي اجاب الشاب فعجبني جدا

هههههههههههههههههه

فعلا ينفع نكتة

حيث بقى انك مهتمة باللغة العربية وبتصاريف الزمان فيها ممكن تنورينا في جروب اللغة العربية المحندق اللى عاملينه

سيسعدنا تشريفك لنا

http://www.facebook.com/group.php?gid=17678674392

تحياتي


نسيت اقول لك صحيح عجبني قوي قوي تشبيهك لطريقة قيادة السائق باللعبة التي يأكل فيها المطبات كأنها ح تديله حياة

هههههههههههه

تشبيه تحفة

ME said...

mohaly:

many jokes are reality now thatit seems like almost the whole life is a joke :(

Bella:

:) شكرا على كلامك الجميل و طبعا يشرفنى انى ابقى عضوة فى الجروب اللى عاملينه .. صحيح انا لا ادعى علما باللغة العربية بس على قدى بقى .. انا اصلا لولا انى كنت فى المواصلات لوحدى كنت ضحكت على تفسير الراجل بس للأسف الفرصة لم تسنح بذلك :)

shaimaa said...

قب يقبقب تقبيباا

:-D
اه وبالمناسبه السعيده دي احب اشكرك علي الفيرس اللطيييييييييف

حسبي الله ونعم الوكيل

أُكتب بالرصاص said...

ههههههههههه


يا تحب يا تقب

مطب بقا او مقب

المهم كلها مرتفعات وكلها خبطات


محور والا دائري

برضاحة
متميزة كالعادة في وصفك للشارع المصري
المقبوب

محمد said...

إممممممممم
بصراحة رغم إني من محبي اللغة العربية من بعيد لبعيد يعني مش متخصص لكن حب و تقدير و إنتماء ليها
بس أول مرة أعرف كلمة المقب
لكن تفسيرك برده منطقي و مقنع
إنما الراجل ده جاب تفسيره منين يا تري

بحس بسعاده لما ألاقي حد الأيام ده مهتم بالغة العربية في ظل إهمال جميع الأطراف
أنا فاكر إن أول مرة علقت في مدونة عندك كان أيضا عن موضوع خاص بالغة العربية
خالص تحياتي

sherif said...

متستغربيش اعتقد انها مش غلطة كبيرة , دا فيه ناس مؤهلات عليا و مصريين و عايشين في مصر لو جيبتيلهم سيرة أحمد نظيف يقولك ايوه عارفه دا بيلعب في الأسماعيلي ؟؟
شخص اخر كان في برنامج مسابقات في التليفزيون المصري من عدة سنوات سألته المذيعة , أين يوجد المسجد الأقصى ,
قال لها في طنطا
و الله بجد

انا لله و انا اليه راجعون

AZ said...

يابنتى ان ابسمع اغنية بتقولك شوفت السمكه الفيش بتعوم فى المية التش
صلى عاللى يشفع فيكى يابنتى لغة ايه وعربى ايه!!!
ب الاغنيبه جامده بينى وبينك ابقى فكرينى ابعتهالك

ME said...

Shimaa:
و الله الفيروس ده بهدلنا كل كمبيوترات الشغل ... معلش .. العيب على الآى تى
:)

أكتب بالرصاص:
هو الشارع المصرى بقى مضروب مش مقبوب .. و واضح انه مبسوط فى هذا الوضع .. يلا بالشفا

محمد:
انا كمان زيك . .بس لما سمعت التعريف ده فى الراديو لقيته منطقى فعلا.. و ياريت أقول كلمة فى حق اللغة العربية تنفعنى يوم القيامة او تنفع اى حد فى الدنيا

Sherif:
لا انا مش مستغربة ... انا بحكى نكتة انت ماخدتش بالك ولا ايه!!
:)
و حكاية المعلومات العامة دى معروف انها باظت من زمان .. عليه العوض ومنه العوض

AZ:
الأغنية و صلت يا حبى .. و عليه افضل الصلاة و السلام

طهقان said...

انا كمان عايز اغنية الفش التش دي

The Groom said...


ربنا يستر على لغتنا دي سعات بحس ان احنا السبب في كل اهمال وتقصير فيها

عموما ربنا يكرمك لتنبيهنا

تحياتي لك من ماناساس البلد وحاسبي من المقبات
:)