هو فيه ايه؟

د

د

هو انا اللى حظى بيوقعنى فى الناس دى ولا بجد دلوقتى كل الناس كده؟!!! انا مش قادرة اصدق اللى بسمعه. د

د ايه حكاية الرجالة المتجوزين والبنات اللى عايزين يتجوزوا؟!!!! هلى معنى انك هتموتى و تتجوزى – على ايه مش عارفة – انك يوم ما واحد يقولك صباح الخير تقعى فى حبه؟!!! ايه الهبل ده؟!!!د

د هلى معنى ان حضرتك راجل متجوز و اتعودت على مراتك عشان بقالكم سنة متجوزين انك تعرف عليها بنات وتتكلموا فى التليفون كل يوم وشات و حكايات؟!!! وياريته كلام عادى ممكن يتقال مع زميلاتك فى العمل او فى نطاق الصداقة العادية جدا مش الصداقة القريبة .. لا ده كلام يخلى البنت تتنيل على عينها و تحب سيادتك؟!! د

د هى الناس اللى اتجننت ولا انا اللى فاهمة غلط؟؟؟

د قال ايه واحد زميلى جايلى يقولى "والنبى الحقينى من واحدة حبتنى رغم انى ماوعدتهاش بحاجة ومش عارف اقولها ايه عشان ماصدمهاش"!!!!!!!!!!!!!! يا نهار اسود!!! والمصيبة ان فعلا البنت بتقوله ايوة انت ماوعدتنيش بحاجة ولا عمرك قلت لى بحبك !!!! د

د

انا عرفت ازاى؟! عادى .... ببساطة اتصل بيها و سألها قدامى وكان حاططها على السبيكر عشان يسمعنى هى متدهوله فى حبه ازاى رغم انه عمره ما قالها حاجة كده .. و بيسمعنى ليه؟!! عشان يبرأ ساحته قدامى انه ماعملش حاجة غلط وانها هى اللى أم لمس ولمجرد انه اتكلم معاها بذوق راحت ماتت فى دباديبه!!!د

د ايه ده؟!!! اييييييييه ده؟!!! وده مش اول واحد يحكى لى بلاوى من دى .. أكم من زملاء دراسة و عمل ييجوا يحكوا لى ان د"فلانة بتحبنى وانا مابحبهاش ومش عارف اقولها ايه"د... يا فرحة امك بيك!!! ويافرحة امك بيكى ياللى مشحتفة نفسك ورا واحد ماوعدكيش بحاجة ولاحتى لمحلك بمشاعر ... ومصيبة لما يبقى متجوز كمان!!!! د

د هى البنات يائسة فى موضوع الجواز للدرجة دى؟!! ماعندهمش مانع انهم يدلقوا روحهم على اى شىء مكتوب فى البطاقة انه راجل لمجرد انها تقعد فى ضله ولا ضل الحيطة؟!!! هما الرجالة للدرجة دى بيتعاملوا مع مشاعر البنات بالاستهتار ده وبعدين ييجى بعد كده يقولها انا ماوعدتكيش بحاجة!!!! انا ماقلتلكيش بحبك!!!! هى الناس بقت رخيصة اوى كده على بعض؟!!! د

د اللى يفرس أكتر ان كل الرجالة – بلا استثناء – اللى سمعت منهم نوعية حكايات من هذا القبيل قبل ماعرف منهم و عنهم الحكايات دى كانوا رجالة محترمين جدا فى نظرى .. وهما فعلا رجالة محترمين و بيصلوا و زبيبة الصلا قد نسر الجمهورية يا خال وصيام وقال الله و قال الرسول .. ايه ده؟!!! ايه اللى بيحصل للناس و فى الناس ده؟!!!! د

د واللى ييجى يقولك "وانا البس دبلة ليه واعرف الناس انى متجوز ولا خاطب و اخوف الناس من التعامل معايا"د!!!!!د هو ايه اللى يخوف فى التعامل مع راجل متجوز ولا مؤاخذة!! ولاانت ايه المصلحة اللى هتبوظ لما الناس تعرف انك متجوز؟!! هو الجواز بقى تهمة اليومين دول وانا مش عارفة ولا ايه؟!!!د

د لا ولما تيجى تقوله هو ينفع تقعد تتكلم على الشات مع ستات وبنات من ورا مراتك ده غلط يقولك ليه هو انا لو مش متجوز مش كنت هتكلم معاهم .. ماشى يا سيدى الكلام ده لو حضرتك بتتكلم فى مواضيع عامة ماتخليش اى حد يتعلق بيك وزى ما بتكلم ستات بتكلم رجالة .. طبعا ماتلاقيش رد .. تيجى تقوله طيب لو مراتك قعدت تتكلم نفس كلامك مع الستات دول مع رجالة .. قبل ماتخلص السؤال تلاقيه بيقول لك دانا اجيب رقبتها .. الله!!! هو الحساب حريمى بس والرجالة معفيين من الضرايب ولا ايه النظام؟!! مش الغلط والصح متساويين عند ربنا برضه ولا يوم القيامة هنتقسم حسب النوع و الرجالة هينزل لهم درجات رأفة والستات لأ!!!!!د

د بغض النطر عن تنازل البنات عن كرامتهم فى مقابل انها تتجوز .. لو افترضنا ان الجواز هدف يستحق التنازل عن الكرامة فى مقابل تحقيقه .. هلى ده يبقى لأى واحد؟!! يعنى اى واحد مسهوك حبتين هوب بيع يا لطفى وترمى كرامتك فى الارض عشان ضل حضرته ولا ضل الحيطة!!! طيب والله العظيم الحيطة أضمن .. على الأقل لو حصل فيها شروخ هتترمم .. لكن الراجل اللى اخلاقه مشروخة ودينه آيل للسقوط مافيش أمل ولا إمكانية لإصلاحه .. هتعملى ايه لو بعد ما دفعتى التمن الغالى اوى ده فى مقابل "ضله" عرفتى بعد كده انه بيحيب واحده عليكى ولا اتجوز عليكى .. ولا لقيتيه بنى آدم ما يسواش ... هترجعى كرامتك ازاى يا قطة؟!! د

د بتعملوا فى نفسكوا كده ليه يا بنات و يا ستات؟!! عشان ايه؟!!! اصل لو فيكوا واحدة قليلة الحيلة و مقطوعة من سجرة ومالهاش دخل كنت قلت معلش عاوزة حد يصرف عليها لكن المصيبة ان كل اللى بسمع عنهم متعلمات و بيشتغلوا وليهم دخل خاص و مستقلات .. تمرمطى نفسك ليه مع واحد مش مقدر مشاعرك ومش هيصونك؟!! ليه يابنت الناس كده؟!! هترخصى نفسك ومشاعرك هتضربى بالجزمة ومش هتلاقى حد يلحقك و لا يطبطب عليكى هتبقى انتى اللى عملتى فى نفسك كده وانتى اللى رميتى نفسك عليه ولا تلومن الا نفسك.د

د والفكرة بقى اللى فى راسى دلوقتى بغض النظر عن قهرتى على البنات والستات وشحتفتهم على حاجات تافهة و وهمية .. هو احنا بنتحضر ولا بنرجع للبدائية؟ يعنى المفروض اننا كل ما بنتعلم و بنزيد حضارة المفروض ان يزيد احترامنا لبعض ولمشاعر بعض .. ونبقى حريصين مانجرحش مشاعر بعض .. اللى بيحصل انه كله بيتفنن إزاى يجرح الباقيين .. وازاى ياخد منهم ومايديش .. و إزاى يؤذيهم و يوجع قلبهم .. هى دى الحضارة؟!!! هو ده اللى اتعلمناه؟؟ هو ده اللى احنا رايحين له؟!!! د

د

د شكراً يا دنيا ويا بنى آدمين على دروس بتعلمها كل يوم ... شكرأ يارب انك بتعلمنى بتجارب وحكايات الآخرين بدل ماتعلمنى بأصعب طريقة .. يارب قدرنى انى ماضعفش قدام نفسى و أذل نفسى لبنى آدم أى كان .. خلينى أفضل عزيزة زى ما خلقتنى يارب .د

د

د