كان نفسى أشترى لها هدية حلوة .. أو نقدر نخرجها خروجة أحلى من دى ... بس فى آخر اليوم عرفت إننا لو كنا مرتبين كل التفاصيل اليوم ماكانش هيبقى حلو زى ما كان ... تلقائى و غير مرتب تماما ... وماكنتش أعرف غير بنتين بس من صاحباتها ... لكن مشيت وانا حاسة ان كل اللى موجودين بقوا أصحابى ... أو كأنهم أصلا أصحابى من الأول .....د
إتكلمنا فى مواضيع كتيرة جداً ... و ضحكت كتير جداً ... و إنتبهت إنى فعلا بقالى مدة ماضحكتش أوى كده من قلبى ... كنا شلة بنات زى السكر ... لمتنا تفرح ... ضحكنا يشرح القلب و ينسى الهم ... و نسيت فعلاً .. نسيت مشوارى البعيد .. و نسيت الوقت .. و نسيت إنى عندى شغل تانى يوم ... ولو كان بإيدى ما كنتش مشيت ....د
أحلى مافى الموضوع ... أو أحلى ما فيها هى كإنسانة .. إنها هى اللى جابت لنا هدايا ... وماكانتش عارفة مين جاى و مين مش جاى ... يادوب مدت إيديها فى شنطتها و طلعت لكل واحدة فينا هدية ... و الحاجة إللى خليتنى أحس إنها بقت كأنها من لحمى و دمى إنها بكل تلقائية أهدتنى صندوق خشبى بنى صغير ... وأنا بعشق الصناديق بجميع أشكالها و أحجامها من غير ما اعرف السبب ... و فضلت ماسكاه فى إيدى وقت طويل قبل ما أشيله فى شنطتى ....د
وانا مروحة بعتلها رسالة على الموبايل أشكرها على اليوم .. وعلى إنها هى زى ماهى .. أنا عارفة إنها مالهاش فى كتر الكلام ... ولما ردت عليا برسالة فيها :) بس ... طرت من الفرحة ... عرفت إنها على الاقل إبتسمت لما قرت رسالتى وده يفرحنى فى حد ذاته ....د
اليوم كان فعلا تحفة ... تالت حفلة عيد ميلاد تعدى عليا و تبقى حلوة أوى كده ... اول حفلة حلوة كانت يوم عيد ميلادى لما تميت 16 سنة ... و التانية يوم عيد ميلاد صاحبتى اللى رحنا فيه الاوبرا ... و التالتة كانت يوم عيد ميلاد صديقتى الجديدة .. صديقتى من زمان .... إللى لو فعلا فيه حاجة إسمها تناسخ أرواح يبقى إحنا أكيد إتقابلنا فى حياة سابقة قبل كده ....
صديقتى العزيزة ... بينى وبينك أيام قليلين .. بحكايات كتيرة ... أتمنى أيام صداقتنا وحكاياتنا تبقى أكتر .....د
صديقتى العزيزة ...... ربنا يحقق لك كل ما تتمنى إن شاء الله ............. كل سنة وانت طيبة ......د
12 comments:
ربنا يفرحكم كمان وكمان
الا بالحق؟؟؟
ايه حكاية عشقك للصناديق؟
عندي واحدة صاحبتي بتموت في حاجة اسمها صندوق
ايا كان لونه او شكله او حجمه
هي دي ظاهرة جديدة والا ايه؟؟؟
والله يا أختشى مانا عارفة إيه الحكاية دى ..هى ظاهرة فعلاً .. بس الاكيد انها مش جديدة :) ..نورتينى
بجد اليوم كان جميل أوى بالصحبة الحلوة .. اى نعم كلنا رحنا تانى يوم اشغالنا مش شايفين ادامنا بس اليوم كان يستحق
كل سنةواحنا بخير و طيبين و أصحاب جامدين
(:كلمة السر سماره نموذجى
إمضاءاللهو الخفى
كان يوم تحفه اصلا هههههههههههههههههه
دا انا قلبي وجعني من كتر الضحك لا وهيا بتقول اصحابي يعني عاوزينهم يبقو عاملين ازاي
حسستني اننا شبهه هههههههههههههه
اللي اللهو الخفي الرساله وصلت يا معلم هل تسمعني حووووول
من اللهو الخفى الى شيماء
واحد اتنيين سلاسة
كلمة السر الخاصة بيكى املاك البرئ:) و حول
يابنتى مش قلتلك انا معرفش ارد عالحاجات دى.. مش واخده على حسن المعامله.. احم احم مثكلين خالث.. ثعدنا بكم ونرجوا ان نكون قد اسعدناكم
------------
الى اللهو الخفى. هأأأو راحت عليك يا حدق ومبقيتش خفى وعرفنا مكانك.. هجووووووووووووووووووووووووووووووووووم
كل سنة وهى طيبة
وعقبال عيد ميلادك انتى بقى الجاي قوليلنا هو امتى ومالكيش دعوة انتى بس
وعلى فكرة كان عندنا صندوق فيه شيكولاتة كنا هانرميه بس خلاص هابعتهولك
:P
أحيانا الواحد بيقابل حد بيحس إنه يعرفه من زمان
بيحس إن في توافق معاه في الأفكار و التصرفات
بيسعد بمعرفته و بيتمنا إن صحبته تدوم
الجميل إنها بتكون صداقة خالصةمفيش وراهاأي غرض تاني
يا رب يدمها عليكي
و بالنسبة للصناديق متستغربيش في ناس بتحب تجمع حاجات أغرب من كده
أنا مثلا بحب أجمع السبح مع إني معمريش إستخدمت أي سبحة
إلى شلة الأنس المكونة من:
اللهو الخفى و شيماء ... عاملين بلوجى لاسلكى!!! أما أشوفكو بس .. صباح الفل يا شيمو .. و "قشطة" يا لهو:)
و إيه موضوع أملاك البرىء ده؟!! فيها لاخفيها .. أنا بقولكوا أهو.
AZ:
لآ خدى على كده بقى من هنا ورايح ... وانا معاكى فى طلعة اللهو الخفى دى .. مش معقول يعنى مقطع على كل المواضيع بالشكل ده ;) و لا ايه؟
***********************************
m-elsewwdy*:
يا سيدى كتر خيرك .. برضه النفس الحلوة ليها الجنة P: .. ومش هقولك على عيد ميلادى .. ده سر حربى شششششش :)
*محمد:
فينك يا عمنا من زمان .. بقالك مدة مختفى ... فعلا ده شعورى مع شلة الأنس دول .. بجد بحبهم أوى وربنا يعلم .. وقعدتهم بجد ما يتشبعش منها .. وفعلا من غير أى غرض .. اللهم إلا اللهو الخفى اللى أغراضه معروفة للجميع
هههههههههه .. لا بهزر
مرورك يسعدنى دائماً .. :)
تحياتى للجميع
على فكرة أنتي أحساسك عالي أوي -على رأي أنتيمتي اللي عرفتني على بلوجك- و بتمنى تكوني صاحبتي مش عارفة ليه حاسة اني أعرفك من زمان.
مبسوطة بمعرفتك ,مبسوطة بصداقتك ,مبسوطة بكلامك الرقيق , وعلى فكرة أنتيمتي معندهاش بلوج أصلا بس هي الل عرفتني البلوجس _علمناهم الشحاتة ...زي ما قالتلي_ و كمان مبسوطة بتوارد الافكار دة و بما أن مفيش أمل من الحكومة نخلي الحل فينا احنا و نحترم بعض و كل واحديحترم نفسه و اللي حواليه في المكان اللي موجود فيه علشان كلنا نرتاح , لكن نقول ايه ! بس ممكن تقوليلي ازاي اضيف حد لبلوجي أو اعمل اي attachment على الصفحة؟
و اولا و اخيرا شكرا على ردك و اهتمامك و اتمنى نكتب لبعض تاني.
كل سنة و اللى كانت عييد ميلاده طيب و عقبال ميه و خمسين سنه بس ماترجعش تشتكى و صديقتى صاحبة البلوج اكتر حاجة فرحتها الهدية اللى جت مش اليوم ولا غيره بطلى نفاق و رغى شوية
(طبعا هزار)
الصديق ايااااه
Post a Comment