وانا مروحة البيت بمشى شارع طويل نوعاً مفتوح على الصحراء مباشرة من ثلاث جهات .. فطبعاً الهوا بيبقى بحرى على الآخر .. ومن يومين، ومع إعتبارات البرد اللى رجع فجأة .. كان طبعاً الهوا هيطيرنى من مكانى ... و كنت ماشية ماسكة جاكتتى و ضاماها عليا رغم إنها مزررة .. و أنا على دى الحال إفتكرت الدرس اللى كنا بناخده فى إبتدائى .. بتاع الشمس والرياح ... فاكرينه؟! لأ؟ لما الرياح تحدت الشمس إنها هتخلى الراجل الغلبان اللى ماشى يقلع العباية بتاعته قبل الشمس ماتقدر .. وفضلت الرياح تعصف تعصف والراجل متبت فى العباية وماعرفتش تخليه يقلعها .. راحت الشمس بمنتهى الرزانة قالت لها ما معناه "إركنى انتى بقى على جنب و إتفرجى ع الحرفنة" و فضلت تزود من حرارتها على نافوخ الراجل المسكين لحد ما فطس وقلع العباية ... د
د
طبعاً كان الدرس المستفاد من القصة إن مش كل الحاجات تتحل بالقوة ولابد من تشغيل العقل و عدم إستعراض العضلات .. والكلام الكبير ده كله .. ولقيت نفسى بفكر .. يعنى هما طلعوا الرياح غلطانة و مستقوية، مش كده؟ و الشمس عاقلة ورزينة و عملت اللى عاوزاه بالعقل والحيلة، صح؟
د
الله!!! طيب وهى الرياح تقدر تعمل ايه غير إنها تعصف و تبقى رياح جامدة وبس ... والشمس كمان، يعنى تقدر تعمل إيه غير إنها تزود حرارتها وبس .... مش كده ولا إيه؟ يعنى كل واحدة منهم عملت اللى تقدر عليه دون إختيار حقيقى لطريقة التصرف ... لو كنا مثلا طلبنا من الرياح الشمالية والرياح الجنوبية نفس الشىء كان هنا يبقى تحدى مقبول ومقارنة فى محلها .. لكن إزاى نقول إن الريح غبية و مستقوية ع الفاضى والشمس ذكية و حيلتها واسعة و الاتنين مش متكافئين فى القدرات؟ يعنى لو كانت الشمس تقدر تعصف هوا زى الرياح أو الرياح تقدر تزود الحرارة زى الشمس كان ساعتها يبقى التحدى بين قوتين متكافئين و نقدر نحكم ساعتها مين أذكى و مين أغبى وكده ... ولا إيه؟
د
إللى ضحكنى بقى .. إننا ساعة ما أخدنا الدرس ده سلمنا بالدرس المستفاد - او انا على الأقل - ومافكرناش إن الاتنين ماعندهمش أصلا إختيارات تانية غير كده .. وإن قوتهم مش متكافئة عشان نصدر الحكم ده عليهم .. الشمس المخ و الرياح العضلات .. يعنى إحنا الاتنين لو مش بنكمل بعض أبقى انا ضعيف و انت حمار على رأى عادل إمام .. وبصيت ناحية الشمس و الهوا هيطيرنى من مكانى .... و ضحكت و قلت لهم معلش ظلمناكم. د
د
د
د* ياترى لسه بيدرسوا الدرس ده فى المدارس ولا بطلوا؟!! د
6 comments:
1 -إنشاء جيش قوي
2- إنشاء مش عارف ايه
4 القضاء على الاستعمار
5 القضاء على مش عارف ايه
تلات اسباب انشاء وتلات اسباب انشاء
اهداف الثورة
حاجات كتير كنا بندرسها
لنكتشف الان انها مالهاش اي لازمة
ان ان الدنيا حوالينا اتغيرت والحنا محلك سر
زي درس الاتحاد قوة
ومجموعة العصيان اللي هانكسرها لو كان كل عصاية لوحدها
اما لو اتحدوا
مش هانقدر نكسرا
دلوقت
اعدائنا علشان يكسرونا
بيجمعونا كلنا في حتة واحدة ..واديلوا
نسيت اقول لك
صباح الخير
a wlahy...3andek 7a2...an makntsh badres hna fa m3rfsh mwdo3 dh madrstosh bs fe3lan lw be 3aklyet sa3ethakon hasalem kda we khlas...eslobek gameel fe 3ard fekretek deh awel mra agy mdwntek bs 7atetha fe el favourite :)..wna mdwen gded ya rab t2blony m3akoo
فى مليون موضوع زمان ايام ابتدائى كنت بحاول افهم احنا بندرسه ليه فلاقيت فى اذنى الجملة الشهيرة لنجيب الريحانى
الاسد بايتكلم
مدام وزارة المعارف قالت انه بايتكلم يبقى بايتكلم
الاسد بايتكلم
الجواز هو النهاية الطبيعية لاي علاقة حب
وبعد الزواج
اكتشفت فعلا حقيقة المقولة دي
ان الزواج مش نهاية لقصة الحب وبس
دا
مقبرة لها كمان
تحياتي
أكتب بالرصاص:
صباح الفل يافندم .. عادى بقى .. حاجات كنا بندرسها ومالهاش لزوم .. وحاجات مادرسناهاش واكن ليها لزوم .. كله بيطلع فى الغسيل :)
erte3ashat:
تنور عالم المدونات والتدوين يافندم .. و شرفت مدونتى بالزيارة :) ياريت تكررها .. تحياتى
طهقان:
انا مش بتكلم فى السياسة الصراحة :) نورتنى
hi ana sara kalamik sa7 awefi 7agat kter awe w e7na so3'ayarin kona mesalimin biyha ../3andik ana masalan lama kona nsafir w e7na so3'ayarin b el tayara kont mota2akida eni law natit mn el tayara hanzel 3ala el se7ab w heya hatshilni w da l2ani kont batfarag 3ala karton fi dabadib bitir fi el sama w tro7 t23od 3ala el sa7ab ...w lama kebirt w fhimt di7ikt awe 3ala nafsi ...1..l2an el dabadib kanit bitir ...2..l2ani kan momkin anot mn el tayara fi3lan ....salam
Post a Comment