عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Thursday, October 4, 2007

نشرة الأخبار

نوافيكم بنشرة الأخبار عن ثلاثة و أربعون يوماً - أو أربعين الله أعلم انهى الصح انا بطيخة فى النحو - د
د
د
كل عام و أنتم بخير بمناسبة حلول - و قرب إنتهاء - الشهر الكريم أعاده الله علينا بالخير واليمن و البركات .. و رغم إرتفاع الأسعار و الزحمة و الحر .. و رغم إستمرار إصلاحات المحور التى تسببت فى أحد الأيام المشئومة بإستمرار وقوفنا دون حركة - ولا حتى قيد أنملة زى ما بيقولوا - لمدة تزيد عن الساعة و ربع .. و رغم صعود أسعار المأكولات و المكسرات الرمضانية بشكل خرافى مما ينبىء بأن الأجيال القادمة ستسمع عن المكسرات باعتبارها جزء من حواديت ألف ليلة و ليلة ... ورغم إن ماحدش طايق حد و حوادث القتل فى إزدياد واضح منذ بداية الشهر الكريم ... ورغم إضرابات العمال و محاكمة الصحفيين .... إلا ان الأمل مازال باقياً خصوصاً بعد إقامة الدورة الرمضانية الأخيرة ... ولسه الأغانى ممكنة .. وكل رمضان و احنا طيبين .. إزاى؟!! ماعرفش
د
د
على الصعيد المنزلى أثارت ترتيبات مختلفة على الصعيدين المادي و الاجتماعي فى البيت مشاحنات و مضايقات من الطرفين لأن ماحدش عارف هو رايح فين ولا هيعمل ايه وكله مضطر وكله مزنوق - و الأهم - كله خايف من بكرة ..... وكله على الله
د
د
الشغل ...... قفش من و على جميع الأطراف المعنية فى العمل بسبب إزدياد نسبة التخلف و العبط و إنحطاط مستوى التفكير مع شغل شغل شغل
د
د
فى هذه الأثناء تم حضور تلاتة انترفيو عمل فى تلات أماكن .. وكله فياسكو ... ياعم الأرزاق على الله احنا يهمنا!! د
د
د
المزيد من الشغل الشغل الشغل
د
د
و فى نطاق الإكتشافات العلمية الحديثة .. كشفت التجارب الواقعية الحياتية أن كل البشر ليهم أجندتهم الخاصة اللى ماعندهمش استعداد يغيروها جزئياً عشان خاطر عيون أى كان .. و لو سيادتك بتغير فى أجندتك دى عشان توصل لحل وسط يقربك من الناس و يخلى الدنيا تمشى .. تبقى دى غلطة حضرتك .. و التجارب دى برضه أوضحت ان اللى بيعمل زى سيادتك - و سيادتى - كده و يحاول توفيق الأوضاع، يبقى - و أبقى - بيعانى من اضمحلال فى تقدير الذات، و تخلف فى الأجندة الشخصية و مش فاهم الدنيا ماشية إزاى .. الشىء الذى قد يؤدى بالضرورة إلى وصفه بالهبل و زيادة إحتمالات إصابته بإرتفاع ضغط الدم العصبى و إمكانية حدوث إنفجار فى شرايين المخ او إصابته بالذهان - بالضرورة - فى حالة إستمراره فى محاولات توفيق الأوضاع .. و تنصح الدراسات باستخدام الجمل التالية لإنقاذ النفس من آثار تصرفات الآخرين: د
د
د
د"إياكش تولع .. أنا هقرف نفسى ليه وعلى إيه ... انا و من بعد منى الطوفان واللى مش عاجبه يشرب م الحنفية عشان نخلص قوام قوام"د
د
د
فى مثل هذا اليوم من حوالى وقت كتير جداً .... بيقولك كان فيه فرعون اسمه بيبى الاول حكم مصر لمدة تسعين سنة .. و بعد وفاته تحولت الدولة الى حالة فوضى رهيبة لأن كل اللى كانوا ينفعوا يحكموا البلد كانوا ماتوا و الباقيين كانوا غير صالحين للحكم ...... د
د ( أستر يارب) د
د
د
الشغل و القلق و الحزن و الغضب و الأرق و اللخبطة و الدنيا.. اكلوا كل الكلام الكويس اللى ممكن يتقال.. و منى بقولهم: د
د
د" بالسم الهارى، يارب تطفحوه" د
د
د
كانت هذه هى نشرتنا .. نشكر لكم حسن إستماعكم و نتمنى أن نوافيكم بأخبار أحسن من كده ... بس آدى حال الدنيا ..د
د
سلامو عليكو

9 comments:

ihapoof said...

عييييييش .. حب الناس وعيش

كل سنه وانتى طيبه

علا من غزة said...


فعلا هي حال الدنيا

ههههه فكرتيني بمنظر مذيعي الاخبار ,, لما بيكون كل الاخبار نكد ونكد ما بين قُتل وحُرق وانفجر واستشهد وبلاوي متلتلة ,, وفي الآآآخر خالص يقولك .. نتمنى لكم مساء سعيدا ولا طابت اوقاتكم

سيبك انتي ,, شعار انا ون بعدي الطوفان ده على فكرة مش اناني ابدا .. اساسا لازم الواحد يهتم بنفسه انه يسعدها عشان يكون قادر يعطي اللي حواليه ويسعدهم

ربنا يقدرك ويقويكي :)

وهي اربعين فعلا :)

تحياتي :)

Eric Matt said...


لا

ليس عبطا ولا هبلا بالعكس هي قدرة وهمية على تصريف الأمور

صحيح الحال دلوقتي لا يسر عدو ولا حبيب لكن الأمل موجود

تحياتي من ماناساس البلد

هشام علاء said...

ربنا يوفقك

و خللى باللك من الاجندة

:)

صديق قديم said...
This comment has been removed by a blog administrator.
Ayat said...

Ihapoof:
وانت طيب يا صديقى العزيز .. متأخرة منى صحيح بس انت الأشطر وسبقتنى .. يارب يكون العيد جه حلو عليك وعلى كل اللى تحبهم :)

علا:
انا بقول كده برضه يا اختشى .. :) منورانى دايما و عيد سعيييد
اشكرك على التصحيح الغوى .. ربنا يسترك يارب

the groom:
يادى النور يادى الهنا :) والهبل والعبط ان الواحد يستمر فى وهم ما حتى ولو من أجل تصريف الامور .. يعنى هيبقى اشمعنى انا اللى خايفة الامور وعايزاها تمشى!! ما لعنها مشيت :) وتحياتى لكل أهالى ماناساس البلد

hesham:
اشكرك .. بس الاجندة فى الامان .. كلمة السر كتكوت :)

Anonymous said...

hi ana sara awalan ana far7ana awi inik a7'eran fedeti w katabti 7aga w 7aga gamila awi kal3ada w begad mesh kalam 7elw 3alashan 7'atrek enti begad bet2oli kalam 7elw :) ..w tani 7aga kol sana w enti tayeba yarab dayman ..talit 7aga di fe3lan nashret a7'bar l2ani zay ma enti 3arfa mesafra w ma3rafshi ay 7aga 3an ili beye7sal 3andik ..w rabe3 7aga ma da2et ila ma foregat :) ensha2alla ili gay 7'er

أُكتب بالرصاص said...

هههههه
فطست على روحي من الضحك

دا انت كان ناقص في اخر المقالة تقولي للقراء

جاتكم القرف ، عايزين تقرؤا أقرؤا ، مش عايزين

يالا..البلد اللي توادي

جاتكم القرف مليتوا البلد



ههههه

ارحمي نفسك شوية..
كل شيء هايرجع زي الاول واحسن كمان

Ayat said...

ساره:

:)

أكتب بالرصاص:

بتضحك على البؤس اللى انا فيه؟!! ماشى ياعم كفاية عليا ان كلامى يخلى حد يبتسم واهو زى ما بيقولوا هم يبكى و هم يا جمل :)

ومافيش حاجة بترجع زى الاول