إزاى كده؟

بصراحة كده مش كويس أبداً ... يعنى أنا عمالة أقرأ كلام كويس أوى بيعبر عن أفكار لطيفة أو سخيفة مش مهم إنما أهو بيعبر عن أفكار ناس زينا برضه .. إنما إللى مش فاهماه مصيبة الأخطاء الإملائية!!!! ومش بقول النحوية ... يعنى أنا واحدة من الناس فى أغلب الأحوال بفضّل إنى أكتب بالعاميّة عشان أخطائى فى النحو ما تتفقسش .. بس المأساة بقى إللى عمالة ألاقيها منتشرة .. الناس الجامدة أوى معظمهم عندهم أخطاء إملائية !!! يادى المصيبة!!! ده كده يبقى الواحد ماعداش من روضة - معلش أصل على أيامى كنا بنسميها كده وماكناش بنسميها كى جى تو - يعنى لو أخطاء نحوية ماشى، مبلوعة .. برضه النحو ده كان بيطلع عينينا فى المدرسة .. إنما أخطاء إملائية!!! ياخبر إسود!!! يعنى مين قال إن فاء العطف يبقى فيها ألف وتبقى "فا" ؟ إزاى دى؟ ولا لقيت واحد كاتب: الشكوى لغير الله "مزلة" !!! طبعاً هو يقصد "مذلة" و أنا إللى بدقق على حاجات غريبة و إنما الأعمال بالنيات بقى ... طيب اللغة ذنبها إيه بالنيات المهببة دى؟! آآه وكلمة ذنب برضه لقيتها كذا مرة مكتوبة بالزاى - إللى بنقول عليها زين - وكلمة كذا نفسها لقيتها برضه مكتوبة بالزاى ... ناس تشقلب الحركات لحروف ويخلوا الفتحة ألف، وناس تخلى الحروف نوايا وإفهمها إنت بقى لو شجيع!!! وناس تكتب لك كلمة مرأة كده : "مراءة" وإللى يكتب لك كلمة مفاجأة من غير ألف بعد الفاء!!

حاجة يعنى تفرح بصراحة ربنا

حد أخد باله من إعلان لوكس إللى متعلق فى الشوارع إللى فيه صورة إليسا؟ حد اخد باله إنهم كاتبين "ماتخفيش" من التألق باين ولا مش عارفة إيه ... ما"تخفيش"؟!! يعنى دى بقى كانت نيتهم فيها إنها ما تخافش-من الخوف- ولا إنها ماتخِِِفّش التألق-يعنى تقلله- ولا إنها ما تِخفيهوش- من الإخفاء وعدم الإظهار يعنى- بالظبط إيه المقصود من الكلمة دى .. ولا كل واحد وعقله بقى؟

المصيبة الأشنع بقى، إمبارح كنت فى ندوة ما وكان فيه واحد بيقدم الندوة وكان بيتكلم عن إنه ياريت نحاول نتفادى الأخطاء النحوية وكان موجه كلامه لل"نقاد" إللى هيتكلموا عن الرواية .. وقعد واحد منهم يدش ييجى ساعة وعمال يقول ألفاظ قد دماغه ويروح فى وسط الكلام إللى كان حريص على تشكيله إظهاراً لمهارته اللغوية ويروح جاى بقى قايل مفاجأة جامدة جداً .. وهو منهمك أوى فى تشكيل كلامه راح قايل: "لنصوصَ" !!! آه والله بالفتحة فى الآخر... ولا كأن إللى فى الأول دى لام جر ... يعنى أنا بطيخة فى النحو .. بس دى كانت أكتر من البطيخ بكتير .. أصلاً وقعت ضحك .. يعنى متفشخر أوى كده وعمال ترص فى كلام متين .. ركز بقى فى التشكيل أو ما تشكلش خالص وخليك عادى .. يعنى هو إحنا فى إمتحان العربى بتاع ثانوية عامة

حاجة بصراحة بقت تكسف إن ناس .. كبار .. سناً وتعليماً .. تبقى عندهم غلطات إملائية .. بصراحة خيبة بالويبة ووكسة قوية أوى ... و د. ميشيل حنا كان زعلان أوى إنه إشترى مجلة أطفال ماكانوش مهتمين بهمزة الوصل والقطع وإنهم كده هيعلموا العيال غلط !! مايعرفش إنه فى كل الأحوال العيال هتتعلم غلط برضه، وماجاتش على المجلة يا دكتور!! ويجعله عامر