مواقف و طرائف

إمبارح كان فعلاً مواقف و طرائف

• إتهفيت فى نافوخى وقلت أمشى من عند جنينة الحيوانات لحد ميدان الجيزة عشان أركب و أروح .... وعاديك عاللى حصللى ... كنت هموت من الإختناق .. ليه؟!! لأنى إكتشفت إن معنى إنك تمشى من هناك، كأنك بالظبط ماشى من جنب دكان بيبيع سمك نىّ وفراخ صاحية الإتنين مع بعض فى نفس المكان!!!! تخيل الريحة بقى ... فطبعاً إضطريت أمشى سادّة مناخيرى معظم الوقت لما فطست.

• بعد ما عديت سور الجنينة لقيت أمين شرطة ماشى مع واحد - غالباً سواق حاجة - بيقوله إيه: "أنا ماظلمتكش، أنا مابظلمش حد" كان نفسى أدّور أقوله " كفك، حلوه النكته دى يا مان"

• مع إستمرار الرحلة فى إتجاه ميدان الجيزة، كان ماشيين قدامى إتنين، ولد وبنوته - هو انا الصراحه ماشفتش منها غير بروفيلها بس، وكان من الواضح إنها اكبر سناً من لفظة بنوته دى- المهم إن الشارع كله كان بيتفرج عليهم بإستغراب يصل إلى درجة الإستنكار، ليه مش عارفة. ملحوظة: هى كانت لابسة بنطلون جينز مدخله رجليه جوة كوتشى برقبة لونه إسود فى أحمر، ولابسة قميص كان ماسك شويتين من عند الوسط، وعامله شعرها قطتين :) ... وللتوضيح قطتين يعنى إتنين ديل حصان .. فمش عارفة إيه سبب إستغراب الشارع

• هو ليه معنى إننا فى الصيف إن الناس تبقى ريحتها غير آدمية بالمرة؟؟! يعنى على رأى اللى قال "مش مهم بارفانات ومش مهم كولونيات، المهم الحموم" ... طيب ماهى الناس ماشية فى الشارع تحت عين الشمس وطالع عينهم منها وطبعاً الحموم مش مضاد للشمس و آثارها هيعملوا إيه يعنى؟؟ أحب أقول إن فيه إختراع لطيف جداً ورخيص جداً جداً إسمه "حجر الشبه" .. بيبقى موجود عند العطار .. وفيه منه بودره .. والحجر بيبقى قد اللُكشة وما بيخلصش وبيبقى بجنيه ... وده طبعاً هيقلل من كل الآثار الجانبية للحر و إللى أقلها الأمراض الصدرية

• وصلت بسلامة الله للميكروباص اللطيف إللى هيوصلنى بإذن الله .. و أنا بقعد لقيت الجلد بتاع الكراسى مكتوب عليه "لويس فويتون" !!!! شفت الإفيه؟! ولمن لا يعرف إبن مين فى مصر ده أقول إن ده بيت أزياء فرنسى بيعمل شنط وجزم بفلوس بالهبل ( متوسط سعر المحفظه من الحجم الصغير 600 دولار طبقاً لبرنامج أوبرا) فهل يا ترى يكون رد فعلهم إيه لو عرفوا بموضوع الميكروباص ده؟

• تعليقاً على تمثال رمسيس : أنا بقيت بشوفه كل يوم و إنتو لأاااا ... أصلى عقبال أملتكو بعدى كل يوم من على المتحف المصرى الكبير ... ودى آخر تداعيات موضوع الميدان لسه واصلانى حالاً فى إيميل :)