عشوائية

أتساءل: ما الذي تفعله امرأة تشعر انها بالصدفة، بالصدفة المحضة، بقيت على قيد الحياة؟ كيف تسلك في الدنيا إن كان وجودها، كل السنين والشهور والأيام واللحظات الحلوة والمُرّة التي عاشتها، فضلَة حركة عشوائية لقدر غريب؟ كيف تسلك في الدنيا؟"


د. رضوى عاشور

Saturday, September 9, 2006

كلنا ليلى: فى الشارع .. فى المواصلات

اول تعامل ليا بصفة مستقلة مع الشارع والمواصلات كان ساعة دخولى الجامعة.. و من ساعتها و انا بشوف العجب .. بجد .. والمشكلة إن الموضوع بيزيد كل يوم عن اللى قبله ... يعنى انا فاكره أيام الجامعة كان ممكن نطلع ميكروباص و لا مينى باص وما نلاقيش مكان مثلا .. فنلاقى ولد أو اتنين قاموا عشان يقعدونا ... وكنا نقعد نقولهم لا والله وشكراً وخليكو وكانوا يصروا ... دلوقتى بقى نادراً ... ومش بتكلم عليا انا بس ... أنا ماعنديش مشكلة فى الوقوف فى المواصلات .. إنما ممكن تكون واحدة ست كبيرة مثلاً ويسيبوها واقفة .. ومش بس كده، لأ .. إللى يعمل نايم وإللى يدفس وشه فى المصحف ويعمل نفسه مش واخد باله ... والله العظيم مش هزار ... طيب هو ايه اللى جرى؟
و الألطف بقى من كده .. ممكن أطلع أركب ألاقى اتنين قاعدين فى كنبه كل واحد على طرف .. ومطلوب منى أقعد فى النص ما بينهم!!! ولما أقول لواحد منهم ياريت تيجى كده عشان أقعد على الحرف يبقوا هما جنب بعض .. يبص لى باستغراب ويهز راسه كأنى بقول كلام غريب ... ولو قعدت وحطيت شنطتى بينى وبين واحد عشان "الدنيا زحمة" زيادة عن اللزوم .. يزعق .. ويقلب وشه ... وشيلى البتاعه دى .. ما كفاية زحمه .. مش عاجبك إنزلى اركبى تاكس .. كأنى مثلاً راكبه مواصلات عشان انا بخيلة ولا غاوية أضايق الناس ولا غاوية الناس تضايقنى!!!
يعنى انا تصورى إن طالما كلنا فى الهم سوا، وكلنا مطحونين وطالع عين اللى خلفونا فى أشغال وزحمة وحر وكل أنواع الغلب إللى بنشوفه، يبقى المفروض إننا يبقى قلبنا على بعض... مش نعض فى بعض.. ونقل أدبنا على بعض .. كفاية اللى بنشوفه من الناس الرايقة اللى ناهبينا وناهبين عرقنا وماصّين دمنا .. ليه إحنا - المطحونين - نعمل كده فى بعض؟
أفتكر مرة أيام الجامعة، دفعت الأجرة 75 قرش زى مانا متعوده، وكان فيه راجل جنبى قالى انتى نازله فين؟ قلت له مكرم عبيد (ده كان أيام بيتنا القديم) قالى طيب يبقى تدفعى 50 قرش بس .. ونده الولد وقاله "الآنسة دفعت 75 قرش"، وجابلى منه الباقى .. اما اليومين دول واحد راجل إدى الست اللى قدامه جنيه عشان هو نازل فى الطريق، والأجره 175 للى هيكمل بعد مسافة معينة، الست بعتت 3 جنيه، السواق سأل"كام من ال3جنيه" ولما فهم قاله يا أستاذ الأجرة جنيه وربع، قعد الراجل يتخانق ومارضيش يديله الربع جنيه الزيادة ولا حتى إداه للست اللى تعتبر كده دفعتهوله من معاها، وقعد عادى خالص ولا كأن حاجة حصلت!!! طب ده نسميه إيه؟
أما فى الشارع بقى ... ما فيش يامه إرحمينى .. اى حاجة ماشية فى الشارع، انشالله تكون دودة حتى، ويبدو عليها انشالله من بعيد إنها ترمى على مؤنث ..لازم تسمع كلمتين خايبين - والكلمتين دول يتراوحوا ما بين "اللهم صلى على النبى" لحد ألفاظ يعتبرها القانون سب وقذف و ممكن تحرش كمان وأحياناً تحريض على الفسق - طيب ليه؟
وعلى فكرة أى واحده ماشية هتسمع الكلمتين دول، ولا فرق بقى بين واحدة لابسة وواحدة مش لابسة مثلاً .. واحدة مدهولة ولا واحدة مأنتكة .. معاها عيال ولا حتى معاها واحد (والله برضه بتتعاكس) طيب ليه كده؟ و أى واحد هيعاكسها، من اول عسكرى المرور ( مرورا بعساكرالأمن المركزى المنطورين على كل ناصية تقريباً و بيحرسوا حاجات ماعرفش هى إيه) والشباب اللى غاوى نواصى وشوارع، وحتى اللى راكبين عربياتهم .. أنا أعرف واحدة ساكنة على ترعة المريوطية، كسر عليها واحد بعربية مقطورة وقعها فى الترعة عشان يعاكسها- والله العظيم حصل بجد- طيب إنت إستفدت إيه؟
يعنى هو مش هيبقى أكتر من البنت إللى خطفوها من خطيبها و بهدلوها وإغتصبت وهو أكل علقة موت .. يعنى أهى مش لوحدها ومعاها راجل ... بس برضه مايهمش ..
وياريت والنبى ماحدش يقولى أصل الظروف والجوابات الإقتصادية، وعشان الشباب مش لاقى يتجوز.... والكلام الخايب ده... ماحنا مش لاقيين ناكل ولا نلبس ولا نركب عربيات ولا نعيش فى شقق واسعة ومش هقول فلل، يبقى يلا بينا نسرق بقى عشان نعمل الحاجات دى كلها، او على الأقل نكسر عربية واحد ونلف بيها شوية عشان نشبع رغبتنا ولا شقته ونعيش فيها يومين عشان برضه نشبع رغبتنا... واحده محترمة- أو على الأقل باين على شكلها محترمة سيبها فى حالها ماهى مش عملالك حاجة تستفز مشاعرك.... واحدة مش محترمة، خليك إنت أحسن منها، ولما تلاقيك إنت وغيرك مش معبرينها، هتعرف إن اللى بتعمله غلط وماتعملوش تانى... لما تبقى تلاقى واحده بقى مصرّه وعمالة تشاغلك وتلاغيك، وانت واحد مابتخافش ربنا وحسابه، وغريزتك أقوى من مقاومتك، إبقى جاوبها بمثل ... لكن مش عمال على بطال ودى زى دى ... ميزوا بين الناس وبين الصح والغلط وإلا هنروح فى داهية بشكل أسرع من اللى إحنا رايحين بيه فى داهية رايحين )
طبعاً هييجى حد يقولى ما تتكلميش عن البنات الملتزمة اللى بيبقوا "لابسين" فيه بنات بتعمل كذا وكيت... الله؟ طب وانت مالك يا اخى؟ خليك إنت محترم عنها الف مرة .. هى عاملة البدع فى نفسها عشان تضحك عليك وتشيلك ذنوب، تقوم انت تقع فى الفخ وتشيلهم فعلاً؟ مش بالذمة دى تبقى غباوة؟ يعنى هى الرقاصة لو ما لقيتش حد يتفرج عليها ويسقفلها ويقولها "إيه الحلاوة دى" مش هتبطل ترقص؟ ماهى مش هتلاقى تشجيع على اللى بتعمله هتدور على غيره
والله يا جماعة ربنا مش بيسيب حاجه لحد أبداً، وكل كلمة وكل حركة حد عملها وظلم بيها حد تانى و لا أساء له، ولا حتى زعله أو جرح شعوره بيها، بتفضل قاعده له .. ولازم ربنا هيردهاله .. تحب فى يوم تلاقى بنتك راجعة البيت معيطة عشان واحد مد إيده عليها من جنب كرسى الأتوبيس ولا الميكروباص وجت بقى مطرح ماجت؟ تحب تلاقى مراتك ماشية فى أمان الله وواحد يركنلها على جنب ويكلكسلها ويفتح لها باب العربية رغم إنها ماشية على الرصيف ومش عاملة أى حاجة غلط؟ تحب حد يقعد جنب أختك ويلزق فيها فى المواصلات بحجة ان الدنيا زحمة "ولو مش عاجبك انزلى اركبى تاكس"؟
لو تحب ده يتعمل مع بنتك واختك وأمك ومراتك، إعمله مع البنات والستات اللى ماشيين فى الشارع أو راكبين معاك
المواصلات .. و تأكد كل التأكيد إنه هيحصلهم هيحصلهم
وعلى فكرة، أنا مش لوحدى

11 comments:

Anonymous said...

المواصلات دي بقا من أكتر الحاجت اللي بكرهها في حياتي
موقف الشنطة دة حصل معايا كتير
و ساعات كنت بحط كشكول كبير و الاقي اللي قاعد جنبي هاين عليه يشدني من الحجاب و يضربني
بس الحمد لله دلوقتي بطلت اركب الميكروباصات المترو أحسن و أرحم و فيه أول عربة للسيدات بتبقى زحمة بس ارحم من الميكروباصات

Ayat said...

أنا للأسف المترو مش فى طريقى خالص .. هو فعلاً أرحم .. بس ده اللى موجود .. و الفكرة إنه مش معنى أن الواحدة راكبة مواصلات يبقى تتبهدل يعنى من كل واحد مش محترم .. ربنا يتوب علينا منهم جميعاً .. المش محترمين والمواصلات :)

بعدك على بالى said...

يا حبيبتى انتهى زمن الرجولة خلاصصص
خلاويص ... بح.. شطبنا.. مبقاش فى من الصنف دة، عملة انتهى زمن تداولها، انقرضت.. المتوفر فى الاسواق الان حاجه كده تايوانى مش اصلى، ومالهاش للاسف قطع غيار... المشكلة فعلا انه مش حاسين وبيتصرفوا عادى

بوست معبر وصادق وجاى على الجرح ..

مبروك علينا الانطلاقة وخروجنا من الشرنقة

تحياتى

Unknown said...

حرررررررررام عليكم التعمييييييييم
لسة فيه خييييير

Polka Dotted said...

:-s fe3lan..
3eb en el bent terkab microbus.. w law rekbet teb2a b their rules !
nice post dear

Ayat said...

كل ليلى عدت من هنا:

كلنا ليلى .. ومبروك علينا تكسير قيود الصمت و إن شاء الله عمرنا ما هنسكت تانى

أبو أمل:

التعميم مش صح، بس فى المقابل فيه رجالة شايفين إن البنات عاوزين ضرب النار .. ده مجرد رد فعل يا أبو أمل .. رد فعل على أفعال كتير من ناس كتير خلتنا زهقنا وقرفنا وروحنا طلعت خلاص ..فإللى كده هيعرف نفسه و يارب يتغير وإللى مش كده هيعرف إن فيه ناس كده و ياريته يحاول معانا نغير الناس دى .. شكراً

Ayat said...
This comment has been removed by a blog administrator.
Ayat said...

الغريب:

قصيدتك جميلة فعلاً ...

بس بعد ما قريتها .. عاوزة أقولك إكتب عن التوجس خيفة

فاهمنى أقصد إيه؟

أُكتب بالرصاص said...

لتاني مرة في نفس اليوم
وبوست تاني يوجع قلبي

حرام عليك
قلبت عليا المواجع

لكن انت كده بتدوسي على الجرح علشان ننضفه

مش كده ؟

على فكرة من أجمل البوستات اللي قرئتها في حملة كلنا لها
قصدي كلنا ليلي

Anonymous said...

hi ana sara shofi enti gebti mn el 2a7'er asl kol lama 7ad yefta7 el mawdo3 da y2olo asl zrof el balad we7sha w el fa2r w el batala w kol el kalam el fadi da ..el moshkila mesh fi da el moshkila in maba2ash fi adab maba2ash fi a7'la2 e7teram el nas li ba3d maba2ash mawgod enas maba2etsh 3arfa en da 7aram w in da 3'alat w in fi yom eyama hayet7asbo fih kol wa7id 3ayiz yosal lili howa 3ayzo 7ata lw betari2a 3'alat aw 7aram ..fahmani

He and She said...

da el moshkela fe masr ba2t kebera ba2a. Every woman is talking about it. Oh God, what is going on there. it wasnt like this 10 years ago