مع فريدة أتكلم

عزيزتى فريدة

افكارك وكلامك فى منتهى الجرأة وفى منتهى الصح، انا قعدت اقرأ وقت طويل فى مدونتك، وعجبنى كلام كتير أوى. أصل انا اكتر حاجه شاغلانى فى الدنيا الناس، والعلاقات ما بينهم، والشد والجذب، الآبس أند داونز زى ما بيقولوا إخوانّا الفرنجة.

وعشان ما اكتبش تعليق طولى كده فى مدونتك فكرت اكتبلك عندى، واهى بالمرة تتشرف مدونتى بزيارتك لو حبيتى.

عن مشكلة المطلقات و إللى بتعدى التلاتين من غير جواز، أقول

المشكلة فعلاً كبيرة ... أسبابها الراجل والست على حد سواء... فى تصورى إن مافيش حد يقدر يفرض على حد وضع معين غصب عنه ... صحيح المجتمع ما يعلم بيه إلا ربنا .. ونظرتهم سيئة جداً للمطلقة - طبعاً اكتر من المطلق بمراحل - بس برضه، ممكن الواحد يعترض وكمان يرفض فرض وضع معين يكون رافضه. فلو الراجل مصر يضطهد المرأة برضه هى تقدر تديله فى سنانه وترفض الإضطهاد والقهر ده.

لسه الصبح كنت بتكلم مع ماما - إللى بالمناسبة هتموت و أتجوز- وكانت بتقولى " مانا كان ممكن اجوزك وانتى عندك 16 سنة وكان زمانك إبنك ولا بنتك فى تالتة ابتدائى" قلت لها وانتى فاكره انى كنت هرضى اتجوز ساعتها.

طبعاً ممكن دى تكون فروق شخصية ومش كل الناس تقدر تكون قاطعة فى ردها، بس بقول إنه ممكن. يعنى إيه إللى يغصب أى حد على اى حد تانى مش مرتاح معاه؟ ممكن تكون ظروف مالية، وغالباً نظرة المجتمع للست المطلقة، ده إللى بيخلى ستات كتير يرضوا بإللى هسميه - مع إحترامى - فرط الرجاله، إللى بيبقوا زى العنب الفرط اللى بيقع من العناقيد وبيبقى إسود ومفعص وشكله عار.

الناس بتبص للست المطلقة - وده كلام سمعته من ناس مفترض فيهم الإحترام - على إنها قنبلة موقوتة، هى ست "مجرّبة" لا تستطيع نسيان التجربة ولو بمرور الوقت، اذاً هى خطر على الرجال المرتبطين و"الخاليين" من الإرتباط ايضاً. وبشكل عام نحن كبشر نحب أن ننسى ان كل ما يحدث "للآخرين" من الممكن ومن البديهى أحياناًً أن يحدث لنا نحن أيضاً. وبناء على ذلك النسيان نبدأ فى الإتهام والتجريح والشك فى الآخرين بإعتبارهم مصدر مشاكل وتهديد وقرف ماله أول ولا آخر، ونحن متناسين اننا ممكن أن نكون فى مكانهم ونكون أيضاً مصدر نفس القرف.

نكره المطلقات والعوانس والمرضى وكبار السن و الآخر بشكل عام لأننا ننسى اننا نحن أيضاً "آخر" قد يكون مكروهاً لسبب أو لآخر فى يوم من الأيام.

الستات والبنات وكل من تتبع حواء ليست ضعيفة إطلاقاً، ولا من جوة ولا من بره، كل الحكاية حاجة من إتنين - فى رأيى الصغنن جداً طبعاً- يا إما حد بيقعد يغسل مخها من وهى صغيرة بكلام خايب عن ضعفها وحاجتها لضل راجل، وإنها لازم تتصرف وتعيش بشكل معين وإلا تبقى مجنونة ومعتوهة وناشز، يا إما هى بتبقى أكسل من إنها تكتشف قوتها دى، وتبقى إتكالية عاوزه حد يعملها كل حاجة.

هو بصراحة كل الجنس البشرى لا يتسم بالضعف - اللهم إلا ضعف العقول أحياناً - بس الستات إتفهم عنهم الضعف كده من غير دليل علمى بالموروث و العرف وكثير من إدعاء المرأة نفسها لضعف غير حقيقى ربما لإكتساب محبة أو تحقيق غرض ما هى وحدها تعلمه.

بس فيه حاجة أحب أقولك عليها، دلوقتى فيه كلمة بقت بتتقال كتير جداً وسمعتها أكتر من مرة، "يتقال عليا مطلقة احسن ما يتقال عليا عانس" بنات كتير بتقول كده دلوقتى، وبيبقى نفسى حد يفهمهم إن اللى بيقول الإتنين أصلاً جاهل ومش فاهم حاجة فمش هتفرق معاه، فى الحالتين المرأة مذنبة ومحكوم عليها.

اختاه، مجتمعنا ناقصة كتير أوى، ومش هيتعدل غير لو كل واحد بص لنفسه، وتخيل نفسه مكان كل واحد تانى هو بيأذيه أو بيضطهده أو بيظلمه أو بيشتمه أو بينتهكه أو أو .... زى بالظبط مانتى قلتى، بيبقوا ستات برضه اللى بيرفضوا الست المطلقة انها تتجوز ابنهم، وبيبقوا ستات برضة اللى بيقعدوا يقولوا بيحبها على إيه والكلام اللى انتى فاهماه.

أنا عارفة إنى طولت موت، بس أنا فى بلوجى بقى :)

متابعاكى، واتمنى أنول شرف متابعتك يا فندم - يعنى لو فيه حاجة تستاهل